Aktori Florjan Binaj, përmes një postimi në rrjetet sociale, falenderon tre forcat opozitare, Partinl Demokratike, Shqipëria Bëhet dhe Nisma Thurje, të cilat janë shprehur të gatshme se do ta mbështesin si kandidat të pavarur për Bashkinë e Tiranës.
Binaj thotë se mbetet i hapur për çdo mbështetje që do të vijë nga forcat opozitare, teksa falenderon edhe qytetarët që e kanë inkurajuar këto ditë.
Ai thotë se nuk është politikan, por qytetar dhe se partia e tij janë qytetarët. Më tej aktori shton se deri më sot ka luftuar padrejtësinë dhe të keqen me humorin dhe artin e tij, ndërsa sot bën thirrje që ta luftojnë me votë.
Postimi i plotë:
Falenderoj për mbështetjen që i dha kandidimit tim si kandidat i pavarur Partia Demokratike, Shqipëria Bëhet dhe Nisma Thurrje.
Mbetem i hapur për çdo mbështetje që do të vijë nga forcat opozitare.
Dëshiroj mbi të gjitha të falenderoj me mijëra qytetarë të Tiranës, të cilët më kanë inkurajuar këto ditë.
Kjo garë është për ju!
Unë nuk jam politikan, jam qytetar dhe partia ime jeni ju.
Deri më sot kam luftuar padrejtësinë dhe të keqen me humorin dhe artin tim, sot ju ftoj ta luftojmë me votë.
Të dënojmë ata që na vodhën dhe bënë humor me ne! Ju ftoj të bëjmë bashkë mendjet dhe zemrat kundër pushtetit që po dhunon jetët dhe të ardhmen e fëmijëve tanë!
