Deputeti i Partisë Demokratike, Belind Këlliçi, i ftuar në MCN TV, ka komentuar dekretimin e qeverisë së re dhe zhvillimet në seancën e sotme plenare.
Këlliçi deklaroi se procesi i dekretimit të ministrave është nisur me shkelje kushtetuese, ndërsa sipas tij, shkelje tjetër u regjistrua sot gjatë fjalimit të kryeministrit, kur në sallën e Kuvendit u shfaq avatari “Diella”.
Sipas demokratit, reagimi i deputetëve të opozitës erdhi pikërisht pas këtij momenti, pasi e konsideruan si fyerje dhe tallje me qytetarët.
“Dekretimi i ministrave është nisur me shkelje kushtetuese. Sot u bë një tjetër shkelje, kur gjatë fjalës së kryeministrit u fut një personazh i tretë, një avatar kompjuterik, duke mbajtur ligjëratë për minuta të tëra.
Në momentin që hyri ‘Diella’, roboti i shpikur nga Rama, pati reagim nga deputetët sepse kjo u konsiderua si tallje me qytetarët. Për më tepër, grupit parlamentar të PD iu mohua e drejta e procedurës, pasi nuk u lejua kërkesa e kreut të grupit”, u shpreh Këlliçi.
Ai shtoi gjithashtu se mandati i ri i ministrit të Brendshëm, Niko Peleshi, ka nisur “mbrapsht”.
