Ish-ndihmëssekretari amerikan i Shtetit, James Rubin ka vazhduar dëshminë e tij në Dhomat e Specializuara në Hagë, ku foli për rolin e Hashim Thaçit brenda strukturave të Ushtrisë Çlirimtare të Kosovës.
Ai deklaroi se, sipas përvojës së tij direkte, Thaçi nuk kishte autoritet vendimmarrës në UÇK, por më tepër vepronte si përfaqësues i saj, duke ndjekur udhëzimet që merrte nga komandantët.
“Shpeshherë, Thaçi na shpaloste qëndrimet e fundit të grupit të tij, i shqyrtonim dhe ndonjëherë arrinim marrëveshje për disa gjëra. Por për mua ishte e qartë që ai nuk kishte fuqinë për të marrë vetë vendime ato i takonin personave të tjerë në hierarki. Ai ishte figura publike, përfaqësuese e UÇK-së”, tha Rubin.
Ai shtoi se ka pasur takime të drejtpërdrejta me komandantët e UÇK-së dhe ka vëzhguar dinamikën e tyre me Thaçin.
“Kam parë me sytë e mi se si komandantët i jepnin udhëzime atij. Nuk ishte Thaçi ai që u thoshte çfarë të bënin ata, përkundrazi, ata i tregonin atij çfarë të bënte”, përfundoi dëshminë Rubin.
