Një ngjarje e rëndë dhune është regjistruar në qytetin e Shkodrës, ku disa të rinj kanë hyrë me forcë në një lokal dhe kanë dhunuar pronarin e tij. Pamjet e publikuara nga JOQ tregojnë momentin kur grupi i të rinjve sulmon brutalisht pronarin dhe personat e tjerë që ndodheshin në lokal.
Pronari ka tentuar të vetëmbrohet, por është përballur me dhunë dhe kërcënime të rënda. Të rinjtë i janë drejtuar atij duke thënë se “të hënën duhet t’u dërgojnë lekët”, madje duke kërcënuar se do t’i vrasin të gjithë. Pas sulmit, ata kanë marrë karriget dhe kanë goditur kamerat e sigurisë për të fshirë provat.
Sipas informacioneve, sherri dyshohet se lidhet me një konflikt të nisur në Angli, ku të rinjtë pretendojnë se djali i pronarit të lokalit u ka vjedhur mall. Në shenjë hakmarrjeje, ata kanë përfshirë edhe familjarët e tij, duke i sulmuar dhe kërcënuar për jetën.
Raportohet gjithashtu se pjesëtarë të të njëjtit grup kanë rrëmbyer në Angli nipin e pronarit të lokalit, të cilin e kanë mbajtur për dy ditë nën dhunë fizike.
Denoncimi:
Policia e Shkodrës duhet të ndërhyjë menjëherë! Një grup djemsh kanë hyrë në lokalin e një qytetari, kanë dhunuar babain e tij dhe miqtë, kanë thyer kamerat e sigurisë për të fshehur provat dhe janë larguar. Të dhunuarit dhe kërcënuarit nga këto djem që kanë lidhje familjare me një fis të njohur në Shkodër kërkojnë mbrojtje.
