Prokuroria e Tiranës ka sekuestruar dy apartamente dhe një garazh të shtetasit A.A., i dënuar me 10 vite burg për trafik të lëndëve narkotike.
Nga hetimi pasuror rezultoi se të ardhurat e ligjshme të këtij shtetasi dhe familjarëve të tij nuk justifikojnë investimet e kryera në këto prona.
Prokuroria kërkoi dhe gjykata vendosi sekuestrimin e pasurive, të cilat dyshohet se janë krijuar nga trafiku i lëndëve narkotike.
Pasuritë e sekuestruara përfshijnë një apartament 1+1 me verandë në Rrugën “Xhanfize Keko” dhe një apartament 2+1 me garazh në një kompleks në ndërtim në Rrugën “Kahreman Ylli”.
“Nga konkluzionet e arritura në aktin e ekspertimit kontabël dhe nga dokumentacioni i administruar, rezulton se pasuritë e identifikuara dhe të zotëruara nga subjektet e këtij procedimi pasuror plotësojnë kriteret e parashikuara nga nenet 11 dhe 24 të ligjit nr. 10192, datë 03.12.2009, për sekuestrimin dhe/ose konfiskimin e tyre, pasi konstatohet se ekziston një disproporcion i dukshëm ndërmjet pasurive të identifikuara dhe të ardhurave të ligjshme të deklaruara, të cilat nuk janë të mjaftueshme për t’i justifikuar ato.
Duke marrë në konsideratë rezultatet e hetimit pasuror të kryer në lidhje me shtetasin A.A. dhe të afërmit e tij, rezulton e provuar ky shtetas ka qenë i përfshirë në veprimtarinë kriminale të “Trafikimit të lëndëve narkotike”, të parashikuar nga neni 283/a i Kodit Penal, vepër penale e cila bën pjesë në veprat e parashikuara nga ligji nr. 10192. Nga kjo veprimtari rezulton se janë krijuar pasuri shpërpjestimore në raport me nivelin e të ardhurave apo fitimeve nga veprimtaritë e ligjshme të deklaruara, të cilat nuk përligjen prej tyre.”- njofton Porkuroria.
