Të dhënat personale të mijëra afganëve që u evakuuan në Mbretërinë e Bashkuar janë ekspozuar pas një sulmi kibernetik ndaj një kontraktori të Ministrisë së Mbrojtjes.
Emrat, informacioni i pasaportave dhe detajet e Afghan Relocations and Assistance Policy për mbi 3,700 afganë mund të jenë komprometuar, pasi kompania Inflite The Jet Centre, që ofron shërbime për fluturimet në aeroportin London Stansted, u godit nga hakerat.
Ky rast vjen vetëm një muaj pas një skandali tjetër të ngjashëm në vitin 2022, kur u ekspozuan të dhënat e pothuajse 19 mijë personave që kishin kërkuar të largoheshin nga talibanët.
Qeveria britanike tha se incidenti “nuk ka paraqitur ndonjë rrezik për sigurinë e individëve, dhe nuk ka komprometuar sistemet qeveritare”, dhe nuk ka prova që të dhënat të jenë publikuar.
Afganët e prekur besohet se udhëtuan në Mbretërinë e Bashkuar midis janarit dhe marsit 2024. Një e-mail nga ekipi i rivendosjes afganëve paralajmëroi familjet se informacioni i tyre personal mund të ketë qenë i ekspozuar, duke përfshirë detaje pasaporte, datën e lindjes dhe numrat e referencës.
Në mesin e të prekurve janë përfshirë edhe anëtarë të forcave britanike dhe ish-ministra të qeverisë Konservatore, sipas BBC-së.
Inflite The Jet Centre tha se incidenti është i kufizuar vetëm tek llogaritë e email-it dhe është raportuar te Information Commissioner’s Office (ICO).
Profesoresha Sara de Jong nga organizata Sulha Alliance e cilësoi incidentin si “tërësisht tronditës”. Ajo kërkoi që MoD të përshpejtojë të gjitha procedurat për afganët.
