Një superjaht kalon nëpër ujëra kristalore, si diçka nga një film i James Bondit dhe ti pyet veten se cilët investitorë të pasur ndodhen në atë bord. “The Sun” ka zbuluar se në vend të milionerëve, jahti zotërohet nga bandat shqiptaro-britanike që kontrabandojnë kriminelë drejt Mbretërisë së Bashkuar, shumë prej të cilëve kanë vuajtur më parë dënime me burg në Britani dhe më pas janë dëbuar nga vendi.
Kjo mënyrë e transportit me jaht ngjall më pak dyshime sesa varkat e panumërta prej gome që kalojnë çdo ditë nga Franca. Jahtet ankorohen në marina të vogla dhe mund të shmangin kontrollet e rrepta në portet e mëdha. Hetimi i “The Sun” vjen pasi zbuluan muajin e kaluar se si mijëra migrantë të dënuar të dëbuar ishin kthyer fshehurazi.
Një gazetar i “The Sun” kontaktoi reklamën e jahtit në TikTok dhe pretendoi se ishte një shqiptar, i cili kishte vuajtur dënimin në burgun Wandsworth në Londrën Jugperëndimore përpara se të deportohej. Pasi u bindën se personi ishte i sinqertë, një nga krerët e grupit kërkoi një numër telefoni celular përpara se biseda të zhvendosej në WhatsApp.
Njëri nga anëtarët e bandës përdorte një numër telefoni në Mbretërinë e Bashkuar dhe më pas ata kërkuan 15,500 paund për një vend në një jaht që po nisej nga Holanda dhe po ankorohej pranë Doverit.
“Kam një vend të lirë në anije sot. Një jaht të madh, një luksoz. Pranojmë vetëm para në dorë. Ne pranojmë para vetëm në Shqipëri,” tha ia.
Më pas, gazetari i “The Sun” kërkoi ta shihte jahtin në një video-telefonatë përpara se të bënte marrëveshjen. Gazetari tregon se pasi ra dakord, ai e përshëndeti shkurtimisht përpara se t’ia jepte telefonin një anëtari tjetër të bandës, i cili premtoi një udhëtim të qetë dhe të sigurt.
Ai i tha gazetarit të “The Sun” se edhe ai ishte ish-i dënuar, i cili ishte deportuar pasi kishte vuajtur një vit e dhjetë muaj në burgun e Doncaster për shitje kokaine.
“Kam katër persona në të njëjtën situatë si ju që do të jenë në këtë udhëtim pas disa ditësh. Mos u shqetësoni për këtë. Kemi shpenzuar 50,000 euro për të marrë me qira një jaht për këtë punë,” tha ai.
Kontrabandisti konfirmoi se kapitenët do të ishin shqiptarë dhe premtoi se nuk do të kishte më shumë se dhjetë pasagjerë në jaht, i cili, tha ai, kishte “tre dhoma luksoze”. I pyetur nëse kishte çuar njerëz në Mbretërinë e Bashkuar kohët e fundit, ai u përgjigj: “Dhjetë ditë më parë, ne dërguam me sukses 11 djem. Po ju dërgoj mesazhe nga katër djem që kanë qenë në burg në Mbretërinë e Bashkuar.”
Më pas ai dërgoi një fotografi të ekranit në WhatsApp duke shpjeguar se tre nga katër migrantët kishin probleme në Mbretërinë e Bashkuar dhe kishin frikë se mos deportoheshin përsëri. Shqetësuese është se ai tha se një nga anëtarët e familjes së gazetarit do të duhej ta takonte në një kafene dhe t’i dorëzonte tarifën përpara se t’i lejohej të hipte në bord.
Banda tha se shoferët do t’i merrnin të sapoardhurit nga një port pranë Doverit përpara se t’i çonin në Londër. Ai shtoi: “Mos u frikësoni, në rregull?”
Kjo vjen pas një hetimi nga “The Sun” muajin e kaluar që zbuloi se 4,614 persona kishin rihyrë në Britani gjatë pesë viteve të fundit pasi ishin deportuar. Të paktën 723 persona janë dëbuar dy ose më shumë herë, ndërsa Ministria e Brendshme pranon se numri mund të jetë edhe më i madh, pasi jo të gjithë personat mund të jenë identifikuar në kontrollet e mëparshme.
Shqiptarët përbënin më shumë se një të tretën e rasteve, me 1,525 persona që u gjetën në Britani edhe pasi ishin dëbuar më parë. Zia Yusuf, zëdhënësi i Reform UK për çështjet e brendshme, tha për ” The Sun” se rasti ishte një shembull pse Britania është bërë një talljeje për imigracionin.
“Ndërsa publiku britanik përpiqet të përballojë miliarda paund të shpenzuara për migrimin e paligjshëm, kontrabandistët e njerëzve na tallen duke na shfaqur pasurinë e tyre para hundëve tona. Konservatorët e shndërruan Britaninë në një derë rrotulluese për migrimin e paligjshëm, dhe Partia Laburiste refuzon ta rregullojë atë. Asnjë komb që respekton veten nuk arrin të kontrollojë kufijtë e tij në një masë të tillë. Reform UK do të ndalonte dhe deportonte çdo migrant të paligjshëm në Mbretërinë e Bashkuar dhe do të siguronte që ata të qëndronin të deportuar,” tha ai.
Por banda e TikTok që u kontaktua nga “The Sun” nuk është e vetmja, pasi jahtet po përdoren gjithnjë e më shumë për të transportuar njerëz drejt Anglisë. Pesë burra u arrestuan në maj pasi një jaht që po kontrabandonte shtatë persona në Mbretërinë e Bashkuar u kap në jug të Anglisë.
Dy anëtarë të ekuipazhit, një britanik 42 vjeç dhe një shqiptar 25 vjeç, u arrestuan nën dyshimin se ndihmuan kalimin e paligjshëm të emigrantëve. Tre persona të tjerë u morën në pyetje, pasi dyshohej se prisnin në breg pasagjerët që do të zbrisnin nga anija. Në mars, dy shtetas ukrainas u dënuan me burg për organizimin e një shërbimi të kushtueshëm kontrabande njerëzish me një jaht.
Vladyslav Cherniavskyi, 38 vjeç, dhe Oleksandr Yavtushenko, 43 vjeç, kishin marrë nga 13 mijë paund për person për të transportuar pesë shqiptarë dhe një vajzë të re vietnameze drejt Britanisë. Ata u ndaluan katër milje larg Chichester, në West Sussex, në korrik të vitit të kaluar. Pronari i jahtit, Cherniavskyi, u dënua me pesë vjet burg, ndërsa kapiteni Yavtushenko me gjashtë vjet.
“Ne ia raportuam gjetjet tona TikTok-ut, të cilët brenda një ore e mbyllën llogarinë. Ata thanë se ajo shkelte udhëzimet e mbrojtjes së komunitetit në lidhje me trafikimin e qenieve njerëzore. Gjithashtu, do ta kalojmë dosjen tonë në Agjencinë Kombëtare të Krimit”, shkruan tabloidi britanik.
Ndërkohë, të dhënat zyrtare tregojnë se më shumë se 11 mijë emigrantë kanë kaluar Kanalin La Mansh me varka të vogla këtë vit. Temperaturat e larta dhe deti më i qetë mund të sjellin një rritje të mëtejshme të këtyre kalimeve. Shqiptarët përbëjnë grupin më të madh të personave që janë kthyer sërish në Britani pas dëbimit, me 1,525 raste. Pas tyre renditen rumunët me 767 raste, afganët me 281, lituanezët me 233 dhe irakianët me 150.
Sipas shifrave të fundit, 1,099 nga rreth 53 mijë shtetas shqiptarë që jetojnë në Britani pa shtetësi kanë përfunduar në burg, pasi një pjesë e tyre janë përfshirë në aktivitete kriminale. Në Shqipëri, disa zona kanë lidhje të forta me emigracionin drejt Britanisë. Qyteti i Hasit, rreth tre orë larg Tiranës, ka aq shumë lidhje me Mbretërinë e Bashkuar saqë shpalli ditë zie pas vdekjes së Mbretëreshës Elizabeth në vitin 2022.
“The Sun” thekson se disa familje në fshatin Golaj, në veri të Shqipërisë, mbledhin para për të ndihmuar të rinjtë të udhëtojnë drejt Britanisë me anije. Gjithashtu ka raste ku persona të përfshirë në trafikun e drogës kanë përdorur paratë e fituara nga krimi për të ndërtuar biznese dhe projekte turistike në Shqipëri.
Një rast i tillë lidhet me vëllezërit Hajdar Copja, 40 vjeç, dhe Franc Copja, 33 vjeç, të cilët, drejtonin një rrjet droge nga Londra dhe investuan miliona paund në një projekt turistik në Shqipëri.
Një tjetër grup i njohur kriminal shqiptar në Britani është Hellbanianz, një bandë e lidhur me trafikun e drogës në Londrën Lindore. Anëtarët e saj kanë tërhequr vëmendjen duke publikuar në rrjetet sociale pamje me makina luksoze, veshje të shtrenjta dhe armë. Në një video muzikore të quajtur “Poppin Smoke”, ata shfaqeshin duke përdorur automjete ushtarake dhe armë të rënda në një zonë banimi.
Ndërsa bandat mbajnë një kontroll të hekurt mbi pjesën më të madhe të furnizimeve me kokainë të vendit, udhëheqësit e tyre mendohet se janë arratisur në Dubai, ku janë shfaqur në mediat sociale duke ngarë makina Rolls-Royce. Në fund të investifimit, “The Sun” shkruan se kjo është një mënyrë jetese që shumica e shqiptarëve mund ta ëndërrojnë dhe disa prej tyre po përpiqen ta nisin këtë rrugëtim në mënyrë luksoze, duke mbërritur në Britani me jaht.
