Policia e Korçës ka identifikuar dhe proceduar penalisht në gjendje të lirë dy prindërit, të cilët në një video të publikuar ditën e sotme në media, shfaqeshin duke tërhequr zvarrë vajzën e tyre të vogël në zonën e Pazarit të Ri.
Lajmi konfirmohet nga burime për mediat, teksa mësohet se bëhet fjalë për babain shqiptar dhe nënën turke, të dy me nënshtetësi holandeze.
Po të njëjtja burime bëjnë me dije se çifti ka dëshmuar në Polici se vajza e tyre këmbëngulte për të blerë lodra dhe se ata janë “detyruar” që ta kryenin atë akt të shëmtuar, pasi vogëlushja nuk lëvizte.
Në pamjet e publikuara në media, vajza e vogël dukej e shqetësuar dhe e frikësuar, ndërsa babai e kishte kapur për flokësh dhe nëna nga krahu, duke e tërhequr zvarrë.
