Kreu i Strukturës së Posaçme Anti-Korrupsion, Altin Dumani ka zhvilluar këtë të enjte një takim informal me gazetarët, ku iu përgjigj pyetjeve të tyre rrethe hetimeve të SPAK.
Një prej pyetjeve ka qenë edhe për dosjen e Ceno Klosit, i cili në shtator do të marrë mandatin e deputetit të fituar në zgjedhjet e 11 Majit në Qarkun e Fierit, duke u futur në Kuvend.
“Për Ceno Klosin vijojnë hetimet” – u është përgjigjur shkurtimisht Dumani gazetarëve, pa dhënë më shumë detaje.
Ceno Klosi, një prej zyrtarëve më besnik të Belinda Ballukut, gjatë viteve 2021 – 2024 ka mbajtur detyrën e Drejtorit të Përgjithshëm të Tatimeve, teksa aktualisht është zëvendësministër i Infrastrukturës dhe Energjetikës.
Më parë, ai ka mbajtur prej 7 vitesh pozicionin e Drejtuesit Financiar në operatorin kryesor të sektorit energjetik (OSHEE), si dhe për një periudhë disa mujore pozicionin e Drejtorit të Përgjithshëm të Agjencisë Kombëtare të Ujërave dhe Mbetjeve (AKUM).
Që nga muaji mars i vitit të kaluar, Ceno Klosi po hetohet nga SPAK për veprat penale të “korrupsionit”, “shpërdorimit të detyrës”, “mashtrimit” dhe “falsifikimit të dokumentave”. Procedimi penaë ndaj Ceno Klosit u regjistruan mbi bazën e dy kallëzimeve të bëra nga Partia Demokratike.
“Mbi bazën e kallëzimit penal të dërguar nga grupi parlamentar i subjektit politik Partia Demokratike, Prokuroria e Posaçme Kundër Korrupsionit dhe Krimit të Organizuar ka regjistruar Procedimin Penal Nr.259/2023 datë 13.12.2023, për veprat penale “Korrupsioni pasiv i personave që ushtrojnë funksione publike ”, “Shpërdorimi i detyrës”, “Falsifikim i dokumentave” dhe “Mashtrimi”.
Për të njëjtin fakt Prokuroria e Posaçme Kundër Korrupsionit dhe Krimit të Organizuar ka regjistruar Procedimin Penal Nr.83/2023 datë 03.07.2023, mbi bazën e kallëzimit penal të dërguar gjithashtu nga subjekti politik Partia Demokratike e Shqipërisë, për veprat penale “Shpërdorim i detyrës”, “Falsifikim i dokumentave” dhe “Mashtrimi”. SPAK ka vendosur bashkimi e dy procedimeve në një të vetëm.” – ka njoftuar Prokuroria e Posaçme për mediat.
Ceno Klosi është paraqitur më 31 Tetor të vitit të kaluar në SPAK ku ka dëshmuar për hetimet ndaj tij, teksa që prej asaj dite nuk dihet se çfarë ka bërë Prokuroria e Posaçme për hetimet ndaj një prej njerëzve më besnik të Ballukut, i cili tashmë po tenton ti shmanget drejtësisë me “mburojën” e mandatit të deputetit.
