Gazetari Enton Abilekaj ka komentuar situatën politike të krijuar pas arrestimit të Erion Veliajt dhe standardin e dyfishtë të Partisë Socialiste në raport me drejtësinë dhe funksionarët e saj.
Në deklaratën e tij, Abilekaj thekson mungesën e çdo konsistence në veprimet e Edi Ramës, duke e konsideruar reagimin ndaj Veliajt si një akt të pastër interesi personal dhe politik, dhe jo parimor.
Ai shprehet se fati i zgjedhjeve në Tiranë do të varet nga dëshira e Ramës dhe jo nga ndonjë standard ligjor apo institucional.
“Edi Rama, në vitin 2017, pa pasur ende një akuzë zyrtare për Saimir Tahirin, e përjashtoi atë nga grupi parlamentar dhe i tha të kërkonte drejtësinë dhe pastaj të kthehej ose jo. Ndërkohë, Veliaj, edhe pse ndodhet në arrest me burg dhe është zyrtarisht i akuzuar dhe i pandehur, nuk është përjashtuar nga asnjë forum i Partisë Socialiste. Kjo tregon qartë se Rama dhe PS nuk kanë asnjë standard, pavarësisht se pretendojnë të kundërtën. Rama e vendos një njeri sepse i intereson dhe e heq, po ashtu, kur nuk i intereson më siç ndodhi me rastin e Veliajt.
Ne nuk mund të themi nëse do të ketë apo jo zgjedhje lokale, bazuar në një standard që PS aplikon në raste të tilla. Kjo është një tekë dhe interes personal i Ramës. Nëse ai ka interes ta heqë Veliajn dhe të zhvillojë zgjedhje lokale, kjo do të varet nga mënyra se si do të zgjohet nesër. Kur Rama të mos ketë më çfarë të prishë në Shqipëri, kur të mos ketë më lajm për të bërë, do ta heqë edhe Veliajn.
Është e kotë të thuhet se Rama do të ketë një strategji në raportin e tij me drejtësinë. Ai ka një strategji vetëm ndaj Veliajt: si do ta shkatërrojë, si do t’ia hapë gropën, sa do ta shtyjë dhe deri ku do ta çojë. Dhe do të zhvillojë zgjedhje në Tiranë vetëm sepse i intereson.
Çështja që është ngritur për Veliajn nuk ka të bëjë fare me parime. Rama, për shembull, ka mbështetur publikisht një person që drejtësia e ka nën akuzë rektorin e Universitetit Bujqësor. Ai shkoi atje dhe tha: “Merrni shembull! 900 mijë eurot që i merrni për laboratorë i bëni rrush e kumbulla.” Ky është shembulli që jep Rama.
Veliaj është një politikan i zhdukur. U mor një ditë dhe u zhduk. Nuk dimë nëse ka më rrjete sociale apo media që kontrollon nuk dimë asgjë. Ashtu si Ilir Meta, edhe Veliaj është i zhdukur. Nuk kanë më as nam, as nishan. Akuza ndaj tij është komunikuar ndërkohë që ndodhej në burg. Për këtë mënyrë sjelljeje, edhe Berisha është detyruar të mbrojë Veliajn imagjino vetë situatën.
Mënyra se si është sjellë SPAK me të tregon qartë se Rama ka dhënë urdhër për ta zhdukur. Zgjedhjet në Tiranë do të bëhen. Logjika thotë që ato duhet të zhvillohen bashkë me të gjitha bashkitë e tjera. Në vjeshtë do të kemi zgjedhje”, tha Abilekaj per SYRI TV.
