Komisioni për Evropën dhe Punët e Jashtme ka rrëzuar kërkesën e përfaqësuesve të Partisë Demokratike për të futur me përparësi në rendin e ditës shqyrtimin e katër projektligjeve që janë thelbësore për procesin e integrimit europian të Shqipërisë.
Me votat kundër të deputetëve të Partisë Socialiste, nuk u miratua propozimi i opozitës për perfshirjen me prioritet të nismave ligjore që synojnë: shfuqizimin e ligjit për Zonat e Mbrojtura, shfuqizimin e ligjit për “Paketën e Maleve”, shfuqizimin e ligjit për Investimet Strategjike, shfuqizimin e ligjit “Për Trashëgiminë Kulturore dhe Muzetë”.
Përfaqësuesit e opozitës në Komisionin për Politikën e Jashtme argumentuan se këto iniciativa lidhen drejtpërdrejt me përmbushjen e standardeve të kërkuara në kuadër të procesit të integrimit europian dhe se shqyrtimi i tyre duhet të jetë prioritet.
Megjithatë, shumica socialiste votoi kundër përfshirjes së tyre me perparësi, duke bërë që kërkesa e opozitës të mos kalojë në komision.
