Pedagogu Romeo Hanxhari ka reaguar ashpër për zjarrin në vendgrumbullimin e Elbasanit, duke e quajtur situatën një “krim mjedisor shtetëror”.
Ai tha se ajo zonë nuk është landfill i mirëfilltë, por një vend-hedhje pa standarde dhe kontroll. Sipas tij, përbërja e mbetjeve dhe mungesa e menaxhimit krijojnë kushte për shpërthime të metanit dhe ndotje të rrezikshme.
Hanxhari paralajmëroi se dioksinat që çlirohen janë shumë të rrezikshme për shëndetin publik dhe mjedisin.
“Ai në Elbasan që mori flakë nuk mund të quhet landfill. Ai nuk është landfill. Nëse quhet landfill, duhet të sanitarizohet, të jetë organizuar me qeliza të izoluara. Duhet kontrolluar prodhimi i metanit, sepse metani e shkakton zjarrin. Mund të quhet vend-hedhje. Aty ka bombola gazi të shpërndara, dhe nuk mund të kontrollohet me dron. Metani krijohet aty, sepse nuk ka oksigjen. Ju po i jepni aspirinë një të sëmuri me kancer. Pacienti është i sëmurë me kancer, është kancer metaforik për vend-hedhjen, por jo metaforik, për ata që jetojnë në Tiranë, Elbasan, për ata që prodhojnë perime, që marrim ne dioksinën. Është situatë tepër problematike. Është krim mjedisor, që mund të quhet dhe krim mjedisor shtetëror, quhet ‘karma’. E kemi gënjyer miletin se gjoja po i trajtojmë. Dioksinat çlirohen dhe merren nëpërmjet ujit ose përmes frymëmarrjes, shkaktojnë deri kancer, deformime gjenetike. Gjithë ata që kanë punuar janë ekspozuar. Në Shijak mbetjet digjen në një vend, që as janë formalizuar nga ana shtetërore. Kjo situatë është në mbarë Shqipërinë, sepse nuk i është kushtuar rëndësi trajtimit të mbetjeve”, tha Haxhari në emisionin “Log.” në News 24
