Gazetari dhe analisti Mentor Kikia e ka cilësuar si “katastrofë mjedisore” zjarrin që përfshiu së fundmi vendgrumbullimin e mbetjeve në Elbasan. I ftuar në emisionin Log. në News24, Kikia theksoi se nuk bëhet fjalë për një rast të zakonshëm zjarri, por për një problem të thellë dhe të qëllimshëm.
Sipas tij, në atë vend nuk ka asnjë kriter mjedisor për trajtimin e mbetjeve, ndërsa zjarrvënia është bërë për të eliminuar “malin e mbeturinave”, pasi nuk ka më hapësirë për depozitimin e të rejave.
“Ai në Elbasan nuk është landfill, por një vend sipërfaqësor. Ishte një vaskë ku do të hidhej hiri i djegur i inceneratorit që nuk u vu asnjëherë në punë. Mbetjet janë hedhur në natyrë, në mënyrë të pakontrolluar, pa asnjë kriter ambiental”, u shpreh Kikia.
Ai theksoi se kjo është një nga ngjarjet më të rënda mjedisore në vend dhe shtoi se situata është pasojë e papërgjegjshmërisë së institucioneve.
“Zjarrvënia nuk është e natyrshme aty, është e qëllimshme. Elbasani duhej të ishte një vijë e kuqe që të na bënte të reflektojmë”, shtoi gazetari.
