Zjarri i 1 qershorit në Landfillin e Elbasanit: Krim për të zhdukur provat e korrupsionit me 9 milionë euro?
4 zjarrvënie të qëllimshme, hetime të pushuara, incenerator që nuk punon dhe një prokuror që mbron vëllain kryetar bashkie; a do të guxojë SPAK të hyjë në skemën e djegies së fakteve në Elbasan?
Zjarri i shpërthyer mëngjesin e 1 qershorit 2025 në Landfillin e Elbasanit, nuk ishte thjesht një incident mjedisor – por një akt i mirëorganizuar për të zhdukur gjurmët e një vjedhjeje kolosale. Katër ditë pas thirrjes në prokurori të administratorit të landfillit, Leli Kaja, dhe 9 zyrtarëve të bashkive ortake, mbetjet iu vu flaka. Dhe ky nuk është rasti i parë.
Që nga tetori 2022, kur Leli Kaja mori drejtimin e shoqërisë “ECO-ELB”, ky është zjarri i katërt i qëllimshëm. Në të gjitha rastet, inceneratori që kurrë nuk ka punuar, është përdorur si justifikim për tenderë fiktivë dhe vjedhje fondesh, të maskuara si mirëmbajtje, sistemim dhe prodhim energjie.
Prokuroria nuk heton, sepse inceneratori “djeg” prova politike
Megjithë raportet e SHISH, anti-krimit ekonomik, dhe ekspertëve mjedisorë, që e cilësuan zjarrin si të qëllimshëm, Prokuroria e Elbasanit ka deklaruar se bëhet fjalë për “vetëndezje natyrale”. Pse? Sepse në krye të këtij institucioni qëndron prokurori Kreshnik Ajazi, vëllai i Besion Ajazit, kryetar i Bashkisë së Gramshit, një nga bashkitë ortake në këtë skemë.
Ky konflikt i rëndë interesi ka bllokuar kalimin e çështjes tek SPAK, ndonëse në çdo aspekt, ajo është kompetencë ekskluzive e tij: zjarrvënie për të zhdukur prova, mashtrime financiare mbi 9 milionë euro, falsifikim dokumentesh, korrupsion me tenderë dhe mashtrime shtetërore për një incenerator që asnjë ditë nuk ka funksionuar.
Si funksionon skema?
Përmes raporteve false dhe akt-ekspertimeve fiktive, Leli Kaja ka justifikuar vazhdimin e vjedhjes së fondeve publike nëpërmjet dhjetëra tenderëve për “aktivizim të inceneratorit”, “mirëmbajtje teknike”, “testime teknologjike” apo “matje ndikimi në mjedis”.
Ndërkohë, kryetarët e 7 bashkive ortake (Elbasan, Gramsh, Librazhd, Belsh, Cërrik, Peqin dhe Prrenjas) kanë kryer pagesa me fatura false, duke transferuar 8.9 milionë euro për një incenerator që nuk ka prodhuar kurrë asgjë. Vetëm 1 ditë pas zjarrit të fundit, u shpall një tjetër tender: 600 milionë lekë të reja për “shtyrje mbetjesh”, dhënë firmës “Mela Sh.p.k”, edhe pse mbetjet tashmë ishin bërë hi.
SPAK ose heshtja e turpshme
Nëse për zjarret e mëparshme drejtësia heshti, për këtë të fundit nuk ka më alibi. Dosja është e mbushur me prova:
-Transferta fiktive financiare
-Tenderë pa konkurrencë
-Incenerator i fikur me bilance të ndezura
-Zyrtarë që vënë flakën për të zhdukur gjurmët
Çfarë pritet tani? A do të guxojë SPAK të thyejë murin e heshtjes dhe të marrë në dorë këtë dosje kriminale? Apo prokurori Ajazi do të vazhdojë ta mbrojë vëllain e tij dhe një rrjet bashkiakësh e drejtuesish të inkriminuar, që djegin jo vetëm mbetjet, por edhe çdo provë që i lidh me vjedhjen?
Për momentin, pyetja që shtrohet është: A do digjen dhe provat siç u dogjën plehrat?/ Pamfleti
Lexo edhe:
Situatë alarmante/ Elbasani 5 ditë nën “pushtetin” e tymit toksik
