Prej ditësh, mbetjet në landfillin e Elbasanit po digjen në natyrë, sepse nuk ka incenerator.
Gazetarja Ola Xama, deklaroi në emisionin “Të Paekspozuarit” se kjo është vera e tretë rradhazi që ndodh kjo ngjarje dhe autoritetet e justifikojnë me temperaturën e lartë dhe çlirimin e gazit metan, megjithatë ka të ngjarë që zjarri të jetë i qëllimshëm për shkak të ezaurimit të kapacitetit të landfillit.
“Kjo është vera e tretë rradhazi, që landfilli i Elbasanit përfshihet nga flakët. Justifkimi që japin është nxehtësia dhe çlirimi i gazit metan. Por dyshimet janë që për shkak të ezaurimit të kapacitetit të landfillit, zgjidhet stina e verës që të justifikohet djegia në gjendje të lirë, duke shkaktuar dëme shëndetësore dhe shqetësim për të jetuar në ato zona”, tha Xama.
Ndërsa Analisti Andi Bushati, sugjeroi se mbetjet mund të çohen te oborret e dy televizioneve, pasi ato i kanë mburrur inceneratorët, ndaj mund të përdoren hapësirat e tyre për të zgjidhur krizën ku ndodhet vendi për menaxhimin e mbetjeve.
Më tej, ai shtoi se nuk është aspak çudi që t’i venë zjarrin edhe mbetjeve të inceneratorit të Tiranës, pasi dhe aty nuk ka më kapacitet.
“Kur keni bërë emision për inceneratorin e Elbasanit, tre ditë më vonë, kanë bërë nga një orë emision Klani dhe Topi, se sa mirë punon inceneratori i Elbasanit. Them këto plehrat e landifllëve hidhini ca te oborri i Topit dhe ca te oborri i Klanit, sepse edhe ata janë po aq përgjegjës. Është rast, kur një koleg bën një investigim, ti të marrësh paratë dhe të bësh të kundërtën, është tmerr.
Kapa mediat, por ke Ramën që çoi Partinë Socialiste atje, nxorrën fatura, që ne po prodhojmë edhe energji. Është mashtrim aq i madh. Kur pashë dje kryetarin e bashkisë së Elbasanit, që thoshte po bien zjarre në verë… Ndërkohë të gjithë e dinë se në Elbasan nuk ka më vend për të çuar plehrat.
E njëjta gjë landfilli i Tiranës, është plot. Duhet ti kërkojmë llogari, ku shkojnë plehrat tona? Terreni është plotë. Ku shkojnë plehrat tona? Edhe Tirana sot nuk ka ku çon plehrat, mos ju duket çudi që t’i djegin edhe këto të Tiranës”, deklaroi Bushati.
