Ndeshja mes Shqipërisë dhe Serbisë, e vlefshme për kualifikueset e Kampionatit Botëror, do të luhet këtë të shtunë në “Arenën Kombëtare”, duke nisur nga ora 20:45.
Në prag të këtij takimi me rëndësi të veçantë, FSHF ka publikuar një listë të detajuar me rregullat që duhet të respektojnë të gjithë tifozët që do të jenë të pranishëm në stadium.
Sipas njoftimit zyrtar, masat e sigurisë do të jenë maksimale, dhe hyrja në stadium do të shoqërohet me kontrolle të imtësishme nga stafi i sigurisë dhe autoritetet përkatëse.
Ja çfarë duhet të dini për të hyrë në stadium:
- Karta e identitetit – Çdo tifoz duhet të ketë me vete një dokument identifikimi (ID) që do të kontrollohet në hyrje. Pa ID nuk do të lejoheni të hyni në ambientet e stadiumit, edhe nëse posedoni një biletë të vlefshme.
- Kontrolle të rrepta – Para hyrjes në stadium do të kryhen kontrolle fizike dhe të çantave. Nuk do të lejohet hyrja me sende të forta, pije alkoolike, mjete piroteknike apo materiale propagandistike.
- Mbikëqyrje me kamera – I gjithë stadiumi do të jetë nën vëzhgim të vazhdueshëm me kamera sigurie. Çdo sjellje e papërshtatshme apo veprim që cenon rendin do të identifikohet menjëherë dhe do të ndiqet penalisht nëse është e nevojshme.
- Mbërrini herët – Për të shmangur radhët e gjata dhe vonesat, tifozët këshillohen të mbërrijnë në stadium disa orë përpara fillimit të ndeshjes.
