Një 70-vjeçar është vënë në pranga nga Policia e Divjakës, pas denoncimit për dhunë në familje nga i biri dhe zbulimit të një sasie të madhe municioni në banesë.
Ngjarja ka ndodhur në fshatin Ferras, ku pas kallëzimit të një 33-vjeçari, shërbimet e Policisë kanë ndërhyrë menjëherë për ndalimin e autorit.
Gjatë kontrollit në banesën e të dyshuarit, shtetasit M. M., u gjetën dhe sekuestruan një granatë dore, 119 kapsolla detonatore, 138 fishekë dhe 9 karikatorë, të gjitha pa leje.
Policia bën me dije se materialet procedurale i janë referuar Prokurorisë së Fierit për veprime të mëtejshme ligjore, ndërsa ndaj të arrestuarit rëndojnë akuzat për “mbajtje pa leje të armëve dhe municionit luftarak” si dhe “dhunë në familje”.
“Arrestohet 1 shtetas që mbante në banesë granatë, 119 kapsolla detonatore, 138 fishekë dhe 9 karikatorë. Ky shtetas gjithashtu dhunoi për motive të dobëta, djalin e tij.
Menjëherë pas denoncimit të një 33-vjeçari, se ishte dhunuar në banesë në fshatin Ferras, nga babai i tij, shërbimet e Komisariatit të Policisë Divjakë organizuan punën dhe shkuan në vendngjarje, me qëllim kapjen dhe nxjerrjen para përgjegjësisë penale, të autorit.
Si rezultat, u arrestua shtetasi M. M., 70 vjeç.
Në vijim të veprimeve policore, u krye kontroll në banesën e këtij shtetasi, ku u gjetën granatë, 119 kapsolla detonatore, 138 fishekë dhe 9 karikatorë, të cilat ai i posedonte pa leje”, njofton policia.
Materialet procedurale iu referuan Prokurorisë së Fierit, për veprime të mëtejshme.
