Analisti Andi Bushati mendon se lajm përbën vetëm qëndrimi i SHBA-ve në raport me zgjedhjet në Shqipëri dhe jo reagimi i BE-së dhe Parlamentit Europian, që sipas tij janë në vazhdën e qëndrimeve të mëparshme.
Duke folur në MCN, Bushati theksoi se zgjedhjet në vendin tonë u çliruan nga amerikanët, pasi sipas tij, Uashingtoni është sot shumë më i distancuar ndaj Edi Ramës se sa ishte 4 vite më parë.
“Ramën e ndëshkuan, por nuk është se promovuan opozitën”, shprehet Bushati, duke iu referuar qëndrimit të Ambasadës Amerikane.
Andi Bushati: “Ka rëndësi që të kemi për këtë raport një vështrim të vërtetë dhe të drejtë. Sepse sot kushdo që ka dëgjuar lajmet është ndeshur me dy opinione diametralisht të kundërta. Përfaqësuesit e mazhorancës thoshin që zgjedhjet u certifikuan ndërsa Berisha thoshte që farsa u vulos nga PE. Berisha thotë farsë, në fakt unë s’jam dakord, por në dokument shkruhej që zgjedhjet ishin konkurruese.
Këtu Berisha s’thotë të vërtetën. Mazhoranca thotë që zgjedhjet u çertifikuan, jo s’u certifikuan, pasi përmendej raporti i ODIHR, përdorimi i administratës dhe intimidimi i votuesve. Ishte diçka në mes, as ajo që trumbeton Berisha dhe as ajo që pretendon qeveria. Ata njerëz që duan të kuptojnë të vërtetën, është mirë të lexojnë raportin vetë. Ajo që kanë bërë europianët është më afër asaj që ne jemi mësuar të dëgjojmë.
Zgjedhje të mira, por që mund të përmirësohen, mblidhuni dhe bëni një reformë zgjedhore. S’ka lajm ajo që thotë PE apo BE. Qëndrimi i Amerikës është lajm. Për një arsye kryesore se ndoshta këto ishin zgjedhjet e para pa mbikëqyrje amerikane. Zgjedhjet shqiptare u çliruan nga amerikanët, ky është lajmi. Amerikanët janë shumë më të distancuar ndaj Ramës se sa ishin 4 vite më pare.
Nuk zgjodhën ta përmendin Ramës siç ka ndodhur më pare, por nga ana tjetër uruan popullin shqiptar për zgjedhjen. Ramën e ndëshkuan, por nuk është se promovuan opozitën. Pavarësisht se e shmangën Ramën s’ia hodhën poshtë zgjedhjet, ishte një distancim për të mos mbajtur qëndrim”.
Analisti thotë se PD ka një problem jashtëzakonisht të madh, pasi i duhet edhe të denoncojë zgjedhjet, por nga ana tjetër s’do transparencë brenda radhëve të saj.
