Edi Rama prej disa ditësh ka nisur një sulm ndaj partive të reja, duke i përmendur në çdo miting, dhe duket se diçka e shqetëson.
Të njëjtën gjë ka bërë edhe gjatë mitingut të sotëm në Gjirokastër, ku Rama i quajti partitë e reja si “farëra të këqija”, duke bërë një krahasim me LSI-në dhe bëri thirrje që të mos i lenë të mbijnë ato.
Sipas Ramës, drejtuesit e këtyre partive vetëm moshën kanë të re, pasi në tru janë të tërë bufa.
“Duhet futur Shqipëria në BE, na ka hapur derën. Ajo është një shtëpi të pasurish, dera hapet kur u intereson atyre. I keni dëgjuar ata gjoja partitë e reja çfarë thonë ‘po na ra ne rasti, dhe nëse na japin votat shqiptarët për të mos lënë të bëhet qeveri do shkojmë në zgjedhje të parakohshme’. A ju kujton ndonjë gjë kjo? Ata që merren me bujqësi e dinë shumë mirë se çfarë është fara e keqe dhe është ajo farë e keqe që polli të ndjerën LSI. Ju e dini se ç’kemi hequr me atë farë të keqe, sot ajo farë e keqe nuk duhet lënë të mbijë dhe të marrë fushat shqiptare. Sepse s’kanë asnjë ofertë, asgjë të re, po atë gjuhë të kënetës, sharjet e akuzat e kënetës. Këneta ka një buf të mbaruar që i fiken llambat në çdo 3 fjali, kurse ata kanë ca djem të rinj, në moshë, por jo në tru. Në tru janë të tërë bufa të vegjël”, tha Rama.
