Kandidati i Partisë Demokratike Përparim Spahiu, ka ka denoncuar publikisht Bashkinë Bulqizë për vendndodhjen e qendrës së votimit për banorët e fshatit Radovesh.
Në një reagim në rrjetet sociale, Spahiu ka bërë me dije se i është drejtuar më një kërkesë për informacion kryetares së Bashkisë Bulqizë, Festime Mjeshtri, ku thekson se është shkelur ligji zgjedhor.
Si thekson se banorët janë të detyruar të përshkojnë 23 kilometra në rrugë të dëmtuar për të votuar në Ostrenin e Vogël, ndërkohë që Ostreni i Madh ndodhet vetëm 4.9 kilometra larg dhe ka qendër votimi aktive.
Sipas Spahiut, edhe pse është e ligjshme mbyllja e një qendre votimi nëse numri i votuesve bie nën 300, ligji nr. 10019, neni 62 pika 7 i Kodit Zgjedhor përcakton qartë se në këto raste zgjedhësit duhet të transferohen në një qendër votimi tjetër jo më larg se 5 kilometra dhe që të ketë mundësi komunikimi rrugor. Në rastin konkret sipas tij, kjo nuk është respektuar.
“A mundet kryetarja e Bashkisë Bulqizë të japë një përgjigje të arsyeshme pse banorët e Radoveshit detyrohen të bëjnë 23 kilometra rrugë të shkatërruar për të votuar në Ostrenin e Vogël, ndërkohë që Ostreni i Madh është 4.9 km larg?
A është kjo një mënyrë për t’i lodhur dhe dekurajuar nga pjesëmarrja në votime?
P.S. Kodi Zgjedhor e përcakton qartë: askush nuk duhet të detyrohet të votojë më larg se 5 km nga vendbanimi i tij“, shkruan Spahiu në Facebook.
