Seanca paraprake për dosjen e privatizimit të ish-kompleksit sportiv “Partizani”, e planifikuar për ditën e sotme, është shtyrë sërish.
Shkak për shtyrjen e seancës është bërë mungesa e Jamarbër Malltezit, Klodian Skënderi. Seancat paraprake për dosjen “Partizani” po vazhdojnë prej 5 muajsh, teksa seanca e radhës është caktuar që të mbahet më 11 Prill, në orën 10:00.
Gjyqtarja Flojera Davidhi do të jepte sot vendimin nëse do të pranojë kërkesën e SPAK dhe çështja do të dërgohet për gjykim, apo mund ta kthejë pas për plotësim hetimesh ose e pushon çështjen. Ky vendim pritet të jepet më 11 Prill, nëse s’do të ketë sërish shtyrje të seancës.
Të akuzuarit për këtë dosje, mes të cilëve është dhe Sali Berisha dhe dhëndri i tij, Jamarbër Malltezi kërkojnë pushimin e çështjes për mungesë fakti.
Sali Berisha akuzohet për veprën penale “Korrupsion pasiv i funksionarëve të lartë shtetërore ose të zgjedhurve vendorë”, kryer në bashkëpunim, ndërsa dhëndri i tij, Jamarbër Malltezi, për akuzën e veprës penale “Korrupsion pasiv i funksionarëve të lartë shtetërore ose të zgjedhurve vendorë”, kryer në bashkëpunim, si dhe për “Pastrim të produkteve të veprës penale ose veprimtarisë kriminale”.
Sipas SPAK-ut, Berisha në kohën kur ka qenë kryeministër ka vendosur në funksion të interesave të dhëndrit të tij bazën ligjore, si edhe ka ushtruar presion mbi vartësit për të nxitur plotësimin sa më të shpejtë të procedurave të kthimit të pronës dhe privatizimit të godinave të degraduara të ish-klubit sportiv “Partizani”.
