Kryeministri Edi Rama thotë se me votën e PS, qytetarët sigurojnë se nuk do të kthehen më pas në kohën kur kishte drejtësi pazarxhinjsh.
Që në mëngjes Rama i bën thirrje shqiptarëve që të votojnë atë që shpesh e etiketon si “drejtësinë e lajthitur” për shkak se një numër i madh ish-ministrash, deputetësh dhe kryebashkiakësh socialistë ndodhen pas hekurave.
Rama përmendi faktin se drejtësia e mëparshme goditi liderin e atëhershëm të opozitës Fatos Nano, ndërsa shtoi se vendi nuk duhet të kthehet pas në “drejtësinë e pazarxhinjve”.
“Shpata e ndëshkimit që në një vend normal, me barazi para ligjit është në dorën e zonjës drejtësi ishte në këtë zyrë. E kishin trashëguar të gjithë të parët e kësaj pune, në mbretëri, diktaturë e demokraturë. Dhe ajo shpatë edhe në kohën e lirisë, pas komunizmit, goditi me urdhër nga këtu nga maja e Piramidës kryetarin e opozitës Fatos Nanon, i cil është edhe i burgosur. Kështu që lufta për drejtësi dhe shtet të së drejtës nuk është e thjeshtë, por e vështirë. Por ama kthesa është e dukshme, e prekshme dhe është e vlerësuar lart edhe nga BE, edhe nga familja e madhe të cilës ne duam t’i bashkohemi dhe nuk bashkohemi dot nëse nuk tregojmë se kemi barazi para ligjit. Kjo është bëma më e madhe dhe më historike e PS, e forcës që qeveris vendin pikërisht prej 2013 dhe që udhëhiqet nga unë me vendosshmërinë më të madhe që drejtësia të bëjë drejtësi dhe që ky proces ka filluar të mos kthehet mbrapa Prandaj këmbëngul të votosh për mua dhe PS. Duhet të votosh me patjetër për arsyen të vetme që barazia para ligjit të mos vihet më në diskutim dhe që çfarë është nisur të mos përmbyset dhe të mos kthehet aty ku ishim në llumin e një drejtësie pazarxhinjsh dhe vetëm drejtësi nuk ishte dhe nuk bënte”, tha Rama.
