Kryeministri i Greqisë, Kyriakos Mitsotakis dhe qeveria e tij e djathtë po përballen me një mocion mosbesimi në Parlament.
Sipas mediave greke, mocioni i mosbesimit është organizuar nga partitë opozitare, për katastrofën në Tempi dy vite më parë, ku humbën jetën 57 persona.
Mocioni, që pritet të dorëzohet sot në parlament, pason protestat masive në të gjithë Greqinë të premten, ku demonstruesit shprehën zemërim për atë që ata e shohin si keqpërdorimin e vazhdueshëm të qeverisë, ndaj përplasjes hekurudhore në Tempi dhe dhënien e ngadaltë të drejtësisë për ngjarjen.
Pas konsultimeve, PASOK, SYRIZA, Nea Aristera (e majta e re) dhe Plefsi Eleftherias (Kursi i Lirisë) nënshkruan një marrëveshje prej 16 faqesh që përshkruan përgjegjësinë, gabimet dhe lëshimet e qeverisë, lidhur me këtë ngjarje.
Procesi ka filluar në orën 11:00 të së mërkurës, me një debat të planifikuar para rendit të ditës në Parlament, për ngjarjen në Tempi.
Pas dorëzimit të mocionit, Parlamenti do t’i kushtojë tre ditët e ardhshme procedurave të mosbesimit, duke pezulluar të gjitha votimet e tjera.
“Mocioni ‘është një kërkesë publike’ dhe shpreh mungesë besimi te qeveria”, tha të martën Nikos Androulakis, kreu i partisë kryesore opozitare, PASOK.
Gjatë fjalës së mbajtur sot në Kuvend, Mitsotakis kritikoi ashpër opozitën për qëndrimin e saj ndaj tragjedisë Tempi. Ai tha se qeveria nuk do të dorëzohet pavarësisht sulmeve të padrejta dhe do të gjykohet në vitin 2027.
“Duan ta kthejnë Tempin në një pikë përçarjeje dhe një slogan politik të lirë”, tha kryeministri, i cili vetëkritikoi edhe veprimet e qeverisë, duke thënë se “nuk e bindëm shoqërinë se ristrukturimi i trenave është prioritet”.
Në këtë kuadër, ai bëri të ditur se qeveria do të punojë për ristrukturimin e transportit në Greqi me dy synime: deri në vitin 2027, rinovimin e mjeteve lëvizëse dhe caktimin e mirëmbajtjes dhe mbështetjes së infrastrukturës si një organizmi të madh evropian.
