Një çift bashkëshortësh nga Dimali janë shapllur në kërkim nga Policia e Beratit, pasi akuzohen se përzienin produkte të dëmshme, të cilat më pas i shisnin nëpërmjet mashtrimit, si vaj ulliri.
Autoritetet policore raportojnë se në kërkim janë shpallur shtetasit E. B., 50 vjeç dhe V. B., 43 vjeçe, banues në Dimal, teksa rasti është kallëzuar nga emisioni “Stop”.
Bëhet me dije se çifti i bashkëshortëve kishte marrë dy ambiente me qira në Shkodër, ku kryenin këtë veprimtari. Policia raporton se në këto ambiente janë gjetur 300 litra përzierje lëndësh të panjohura dhe të dëmshme, të cilat shiteshin në qytetin e Shkodrës si vaj ulliri.
“Janë kryer kontrolle në 2 magazina në Shkodër, në pronësi të shtetases J. M., 40 vjeçe, të dhëna me qira, bashkëshortëve E. B., 50 vjeç dhe V. B., 43 vjeçe, banues në Dimal. Në këto ambiente janë gjetur 300 litra përzierje lëndësh të panjohura dhe të dëmshme, të cilat shiteshin në qytetin e Shkodrës, nëpërmjet mashtrimit, si vaj ulliri.” – njofton Policia.
Ndërkohë, uniformat blu kanë proceduar penalisht në gjendje të lirë dhe pronaren e magazinave, shtetasen J. M., 40 vjeçe. Policia ka sekuestruar 300 litra vaj (përzierje lëndësh të panjohura dhe të dëmshme) dhe automjeti me të cilin shitej vaji në qytetin e Shkodrës.
Materialet procedurale iu referuan Prokurorisë së Beratit, për veprime të mëtejshme, për veprat penale “Fshehja e të ardhurave”, “Mashtrimi me produktet ushqimore”, “Mospagim i taksave dhe tatimeve”, “Moslëshimi i kuponit tatimor” dhe “Ushtrimi i aktivitetit të palicencuar ose i paregjistruar në organet tatimore”.
