Është mbajtur këtë të enjte seanca gjyqësore në GJKKO për Dritan (Gramoz) Rexhepi dhe të bashkëpandehurve, të akuzuar për rrëmbimin dhe zhdukjen e Jan Prengës.
Në fjalën e tij, Dritan Rexhepi ka mohuar njohjen me Gentian Funiqin, alias Dodën, me të cilin dyshohet se ka dhënë urdhër për rrëmbimin e Jan Prengës.
Po ashtu, Dritan Rexhepi ka sqaruar se në kohën kur ka ndodhur ngjarja ndodhej në burgun e Pratos, në siguri të lartë, për shkak të një procesi në Apelin e Firences.
“Në burgun e Pratos kam qenë në sigurinë e lartë pasi kisha Apelin në Firence dhe me mbajtjen 10 ditë. Nuk e njoh, se kam parë ndonjëherë në jetën time Gentian Funiqin. Do ja faktoj këtë prokurorëve me prova në vijim”, ka deklaruar Dritan Rexhepi.
Ndërkohë, në seancën e sotme avokatët e të pandehurve kanë kundërshtuar provat shkresore të paraqitura nga Prokuroria e Posaçme.
Në seancën e kaluar, SPAK paraqiti provat shkresore para gjykatës, gjithsej 13 faqe. Mes tyre, aktet e këqyrjes së vendit të ngjarjes dhe akt-ekspertimi që tregon përputhshmërinë e ADN-së të përftuar nga njollat e gjakut të vendngjarjes me ato të nënës së Jan Prengës.
Po ashtu, prokurorët e SPAK, pohuan se përmes pamjeve filmike të sekuestruara në disa biznese është dokumentuar itinerari i ndjekur nga automjeti ku është futur me forcë Janë Prenga. Përmes pamjeve është provuar se viktima është mbajtur nën vëzhgim për disa ditë përpara ngjarjes, ku automjeti “Land Rover” i të dyshuarve ka ndjekur automjetin e viktimës në 15, 16 dhe 17 janar.
Jan Prenga u rrëmbye janarin e vitit 2020 në Kamëz. Pas rrëmbimit ai u dërgua në kompleksin “Golden” në Shijak, në pronësi të Altin Hajrit, ku Festim Bixhdili punonte si ishte kopshtari.
Sipas pamjeve nga kamerat e sigurisë, Jan Prenga dyshohet se u dhunua për vdekje dhe asgjësimi i trupit ka dyshime se u bë në fshatin Pjezë, shumë pranë kompleksit, teksa kufoma ende nuk është gjetur.
Rrëmbimi erdhi pasi vëllai i Jan Prengës vodhi një kontejner me drogë në Britaninë e Madhe. Sipas SPAK, Festim Bexhdili e dinte vendin ku kanë groposur trupin e Jan Prengës, por nuk e tregon atë.
Sipas Prokurorisë së Posaçme, urdhri për rrëmbimin e Jan Prengës ishte dhënë nga Dritan (Gramoz) Rexhepi dhe i bashkëpandehuri i tij Gentian Funiqi (Doda), organizimi është bërë nga të pandehurit Martin Bleta e Korado Keshteja, ndërsa ekzekutimi i rrëmbimit është bërë nga të pandehurit Artan Doçaj, Aldo Majnishta, Geraldo Martini dhe një person tjetër i paidentifikuar.
Porosia për rrëmbimin e Jan Prengës u dha teksa Rexhepi ishte i burgosur në Ekuador, në Amerikën Latine dhe kishte si qëllim shtrëngimin e vëllait të Prengës, që kishte vjedhur një sasi kokaine të trafikuar nga Ekuadori në Angli. Familja Prenga zhvilloi edhe negociatat me rrëmbyesit dhe një pjesë e kokainës u dorëzua, por ndërkohë Jan Prenga kishte humbur jetën.
