Prokuroria e Korçës ka shpallur moskompetencë për hetimin e rastit të vdekjes së 12-vjeçarit Leo Sadiku nga fshati Pocestë i Maliqit.
Kjo për shkak se i mituri humbi jetën në Qendrën Spitalore Universitare “Nënë Tereza” dhe çështja do t’i kalojë për hetim Prokurorisë së Tiranës.
Organi i akuzës ka regjistruar kallëzim penal për rastin, pas denoncimit nga familja e të miturit të cilët kallëzuan mjeket e Korçës dhe Tiranës për neglizhencë me pasojë vdekjen e djalit të tyre.
Sipas familjarëve, mjekët pretendonin se i mituri kishte vetëm një virozë, ndërkohë nga kartela që e kanë parë mjekët në Greqi dhe në Gjermani, Leo rezulton se kishte një infeksion bakterial.
Kujtojmë se kallëzimi i familjarëve erdhi pas kallëzimit që ka bërë mjekja pediatre me inicialet J. B. ndaj nënës 44-vjeçare Roveta Sadiku të të miturit, ku e akuzon se e ka dhunuar, Ajo është vënë nën hetim për veprën penale “Goditje për shkak të detyrës”.
Nëna e Leo Sadikut, Roveta Sadiku në një prononcim për mediat ka mohuar lajmet se ka ushtruar dhunë ndaj mjekes që ka trajtuar djalin e saj.
“Jam përballur me mjeken në QSUT, teksa kishim mbesën në spital. Kur e kam parë më janë errur sytë, dhe më është rikthyer e gjitha çfarë kishte ndodhur. I kam thënë se pse ma vrau djalin dhe i jam afruar. Aty me ka rënë të fikët. Ka pasur dëshmitar që nuk e kam dhunuar atë mjeke. Unë këtë çështje ia kam lënë drejtësisë dhe pres që për djalin tim 12-vjeçar, të bëhet drejtësi”, u shpreh ajo.
