Nga Artan Hoxha
Edi Rama në trilemë. Për shkak të Erjonit, Veliajt pra, që ia nxorrën nga loja me të kuqe SPAK/GjKKO e tashmë shpresat për fitore në Tiranë, sic tha vetë dje në takimin e përmo(r)tshëm, i ka tek blerja magjike e Erjonit tjetër, Braçes së vogël, në ekipin rilindës të Tiranës.
Nga Kryeministër ardhur në pushtet me shtytjen e buldozerit Meta, vijuar me mendjelehtësinë e balerinit Basha, më pas me bekimin e neo-liberaleve-sorosiane të Uashington-it (DC), vizioni i tij filloi të shtrihej në 20 vitet e ardhshme – Ai, Diktatori i Ndritur.
Për këtë i duhet edhe pushteti i plotë edhe shkëlqimi i panjollë e, këte të dytin, pas kaq vitesh balte ngjitur në trup, mund ta lajë vetëm me certifikatë gjykate, duke dënuar gjith të tjeret veç ai jo. I pahetueshëm, i pagjykueshëm, i paqortueshëm. Qentë le të lehin më pastaj.
Pushteti nuk mund të jetë as i plotë e as i sigurt pa prokurorinë dhe gjyqësinë. Këto i mori nën bashkëpronësi me amerikanët mbështetës. Të dy pronarët e përdorën sistemin siç deshën kundër opozitës. Tek të tijtë sipas rastit: Ahmetaj i malokut, Beqja i bablokut. Dënimi i opozitës i shërben sigurisë e jetëgjatësisë së pushtetit, dënimi i të vetëve i shërben shkëlqimit të pushtetit.
Ndaj, lema e parë e Edit është se si ta kapitalizojë procedimin e Erjonit, si ta përdorë për lavdinë e tij, shkëlqimin e pushtetit të tij-Ai, reformatori i ndritur që me drejtësinë e rilindur prej tij ndëshkon edhe të vetët që hanë mollë e dardha pas shpinës së tij, qofte ky edhe Erjoni, dora vetë. Ndaj, në gjithë këto dalje këto ditë vijon të thotë se do e mbështesë pavarësinë e drejtësisë, por…
Lema e dyte e Edit është të mos e shndërrojë Erjonin në Arben, ta lerë zemra e mendja e të fillojë të nxjerrë broçkulla, aq me keq të ndërsejë të vetët kundra në fushatën zgjedhore. Ndaj shan, mallkon e kërcënon gjykatësin e çështjes, prokurorin e çështjes por…. jo Dumanin e çështjes.
Lema e tretë e Edit, me e freskëta, është se bashkëpronari amerikan, i mëparshmi neo-liberalo-sorosian, është vetë non-grata në ShBA dhe pritet të zevendësohet së shpejti nga një anti-sorosiano-konservator i thekur ndërsa Doktori e ka tashmë ndërlidhjen e drejtpërdrejtë me Trump përmes LaCivita-s, e pra, në mos shumë shpejt, gjithsesi shpejt, do i nisin konfliktet e bashkëpronësisë e një dreq e di se nga do anojë peshorja e drejtësisë.
Nuk kam se si të mos e mirëkuptoj në këtë trilemë.
