Liderët e Bashkimi Evropian deklarojnë se janë të gatshëm të përgjigjen “me forcë” nëse shënjestrohen nga tarifat e SHBA-së, ndërsa “shprehin keqardhjen” për rritjen e tarifave në produktet nga Kanadaja, Meksika dhe Kina.
Bashkimi Evropian e cilësoi këtë masë si “të dëmshme për të gjitha palët”.
“BE është plotësisht e bindur se tarifat e ulëta promovojnë rritjen dhe stabilitetin ekonomik”, por “BE do të përgjigjet me forcë” nëse synohet nga tarifat “të padrejta”, paralajmëroi Komisioni Evropian.
Ministri francez i industrisë Marc Ferraçi i tha medias franceze Le Figaro se “është e qartë se duhet të reagojmë”.
“Përgjigja, për të qenë efektive, duhet të fokusohet në produktet që janë të rëndësishme për vendin me të cilin po negocioni”, shton ai.
“Trump ka një mandat specifik nga populli i tij: të riafirmojë primatin amerikan, të rifillojë industrinë dhe vendet e punës në Shtetet e Bashkuara”.
Ai shton se: “Europa duhet të bëjë të njëjtën gjë… me shpejtësi të barabartë”, por paralajmëron se “në të njëjtën kohë, duhet të diskutojë me SHBA-në për të shmangur nxitjen e një lufte tregtare shkatërruese”.
Kujtojmë se tarifat e SHBA-së ndaj Kanadasë, Meksikës dhe Kinës, siç njoftoi Shtëpia e Bardhë, do të hyjnë në fuqi nga e marta, më 4 shkurt, me reagimin e tre vendeve që do të jetë i menjëhershëm, tre vendet do të përgjigjen me tarifa hakmarrëse.
Bëhet fjalë për tarifa 25% për importet nga Kanadaja dhe Meksika dhe tarifat 10% për importet nga Kina.
Këto masa rrezikojnë nxitjen e një lufte tregtare, që mund t’i dëmtojë në mënyrë të konsiderueshme ekonomitë e shteteve të shënjestruara, por edhe të Shteteve të Bashkuara, sidomos për faktin se Kanadaja, Meksika dhe Kina janë zotuar për kundërmasa.
Në urdhrin ekzekutiv të prezantuar nga Trumpi përfshihet edhe një pikë që i lejon presidentit t’i zgjerojë tarifat, nëse një shtet vendos kundërmasa ndaj SHBA-së.
Presidentja e Meksikës, Claudia Sheinbaum, ka thënë se shteti i saj do të vendosë tarifa ndaj SHBA-së, ndërsa kryeministri i Kanadasë, Justin Truedeau, ka paralajmëruar masa hakmarrëse “me shtrirje të gjerë”.
Ministria e Ekonomisë e Kinës, e ka lëshuar një deklaratë, duke thënë se Pekini do të ngre padi kundër Shteteve të Bashkuara në Organizatën Botërore të Tregtisë, dhe do të ndërmarrë kundërmasa, por pa dhënë më shumë hollësi.
