Kryeministri Edi Rama ka komentuar sot akuzat e ish-zv/kryeministrit Arben Ahmetaj.
Rama ka deklaruar se ka qenë Partia Socialiste që e ka bërë “Reformën në Drejtësi”, e cila sipas opozitës është një “kamxhik” në dorën e kryeministrit që përdoret për të goditur kundërshtarët politikë.
Rama ka deklaruar se ata që i quajnë ‘çetë hajdutësh’, deri dje kanë qenë në një karrige me ata dhe sot janë në duart e drejtësisë.
“Ata do tu thonë se unë dhe ne jemi “çetë hajdutësh”, se ja ky dhe ai, që ishin deri dje me ne, deri në një karrige më tutje nga unë janë sot në duart e drejtësisë apo në kërkim por do tu thoni vetes dhe të tjerëve se po të mos ishin ne socialistët për t’i dhënë pavarësisë drejtësisë nuk do të kishte asnjë njeri me pushtet politik përpara drejtësisë siç nuk pati kurrë më parë që nga 1912 deri kur bëmë reformën në drejtësi. Reformën në drejtësi e bëmë siç e thamë, jo për të luftuar kundërshtarët nëpërmjet drejtësisë por për të dhënë për herë të parë në histori shqiptarëve shansin real të ndërtimit të një shteti shqiptar të së drejtës. Ky popull se ka pasur kurrë një shtet të së drejtës. Pikërisht se ky vend ka këtë parti, PS, ka sot edhe shansin historik të ndërtojë një shtet të së drejtës me çdo dhimbje, kosto dhe çmim. Por me vendosshmërinë e arritjes së atij suksesi që do të mbetet në histori jo vetëm duke ëndërruar, as duke luftuar për të, as duke vrapuar drejt tij por duke u ringritur sa herë që stërkëmbëshat kërkojnë të na kthejnë pas”, u shpreh Rama.
