Gjykata e Tiranës ka nxjerrë nga burgu edhe protestuesin e dytë të arrestuar tre ditë më parë në protestën e mbajtur nga opozita, ku u bllokuan prej rreth tre orësh 5 akse kryesore në kryeqytet. Bëhet fjalë shtetasin Sokol Ndoj, të cilit i është ndryshuar masa e sigurisë nga “arrest me burg” në “arrest shtëpie”.
Togat e zeza kanë miratuar kërkesën e Prokurorisë me argumentin se i riu duhet të qëndrojë në këtë masë pasi rezulton të ketë edhe dy precedent të ngjashëm nga protestat e kaluara. Ndaj Sokol Ndojit rëndojnë akuzat për veprat penale “Pengimi i qarkullimit të mjeteve të transportit” dhe “Kundërshtimi i punonjësit të policisë së rendit publik”.
Ditën e djeshme u lirua nga Gjykata edhe protestuesi tjetër i arrestuar, 53-vjeçari Ilir Hamedani, i cili u la nën masën e sigurisë “detyrim paraqitje”.
Kujtojmë se nën hetim Policia vendosi edhe 17 deputetë të PD-së, duke përfshirë dhe Sekretarin e Përgjithshëm, Flamur Noka dhe kreun e grupit parlamentar Gazment Bardhi. Po ashtu nën hetim u vu dhe Sekretari Organizativ, Ervin Minarolli.
Ata akuzohen për veprat penale “Pengimi i qarkullimit të mjeteve të transportit”, “Organizimi dhe pjesmarrja në grumbullime e manifestime të paligjshme”, “Mosbindja ndaj urdhrave të punonjësit të rendit publik”, “Prishja e rendit dhe e qetësisë publike”, ndërsa Flamur Nokës i është shtuar dhe vepra penale “Goditjet për shkak të detyrës”.
