Presidenti i zgjedhur Donald Trump e ka cilësuar rrëmbim politik periudhën kur përballej me çështjet penale të ngritura ndaj tij.
Republikani 78-vjeçar pretendon se më shumë se 100 milionë dollarë të taksapaguesve amerikanë janë shpërdoruar në luftën e Partisë Demokratike kundër tij.
“Ishte një rrëmbim politik dhe një moment i ulët në historinë e vendit tonë që diçka e tillë mund të kishte ndodhur. Megjithatë, unë qëndrova i vendosur, kundër të gjitha gjasave, dhe FITOVA. TA BËJMË AMERIKËN SËRISH TË MADHE! Këto çështje, ashtu si të gjitha të tjerat që jam detyruar të përballem, janë bosh dhe të paligjshme, dhe nuk do duhej të ishin ngritur kurrë. Më shumë se 100 milionë dollarë të taksapaguesve janë shpërdoruar në luftën e Partisë Demokratike kundër kundërshtarit të tyre politik, MUA. Asgjë e tillë nuk ka ndodhur kurrë më parë në vendin tonë. Ata gjithashtu kanë përdorur prokurorë shtetërorë dhe prokurorë të qarkut, si Fani Willis dhe i dashuri i saj, Nathan Wade (i cili nuk kishte absolutisht asnjë përvojë në çështje të tilla, por u pagua me MILIONA, mjaftueshëm për të bërë udhëtime dhe lundrime të shumta anembanë globit!), Letitia James, e cila në mënyrë të papërshtatshme, joetike dhe ndoshta të paligjshme, bëri fushatë me premtimin “TA KAPIM TRUMP” për të fituar zyrën politike, dhe Alvin Bragg, i cili vetë nuk donte të ngrinte këtë çështje kundër meje, por u detyrua ta bënte këtë nga Departamenti i Drejtësisë dhe Partia Demokratike”, shkruan Trump në rrjetin social ‘Truth Social”.
