Bashkimi Evropian po përgatitet të kanalizojë më shumë se 390 miliardë euro shpenzime për mbrojtjen dhe sigurinë e bllokut. Pas zgjedhjes së Donald Trump në krye të Shtëpisë së Bardhë, kanë rinisur diskutimet për forcimin e industrisë evropiane të mbrojtjes.
Tërheqja e mundshme e SHBA-së nga marrëveshjet e NATO-s dhe reduktimi ose ndërprerja e ndihmës ushtarake amerikane për Ukrainën rrit sfidat dhe rreziqet për sigurinë e BE-së. Përveç kësaj, Trump ka paralajmëruar aleatët e NATO-s se ai nuk do të garantonte mbrojtjen e tyre nëse nuk paguanin pjesën e tyre të drejtë të shpenzimeve të mbrojtjes, të paktën 2% të Prodhimit të Brendshëm Bruto.
Ndërkohë, aksionet në industritë evropiane të mbrojtjes u rritën pas zgjedhjes së Trump. Aksionet e kompanisë italiane Leonardo SpA u rritën me 17% ndërsa ato të prodhuesit gjerman të armëve Rheinmetall me 22%.
Sipas Financial Times, Brukseli po ndryshon politikën e financimit të BE-së për të ridrejtuar deri në 1/3 e buxhetit të BE-së për 2021-2027 në shpenzimet e mbrojtjes.
Këto fonde do të merren nga Fondet e Kohezionit, të cilat synojnë reduktimin e pabarazisë ekonomike mes vendeve të BE-së. Shtetet anëtare do të kenë më shumë fleksibilitet në ndarjen e këtyre fondeve për të mbështetur industritë e tyre të mbrojtjes dhe projektet e lëvizshmërisë ushtarake, siç janë përforcimi i rrugëve dhe urave për të lejuar kalimin e sigurt të tankeve.
Kjo do të përfshijë lejimin e financimit për rritjen e prodhimit të armëve dhe municioneve, megjithëse ndalimi i përdorimit të fondeve të BE-së për blerjen e këtyre armëve do të mbetet efektiv.
