Gazetari Bledian Koka shprehu kritika të ashpra ndaj politikave dhe vendimeve të kryeministrit Edi Rama. Ai u ndal te mungesa e koherencës dhe e përkushtimit të Ramës ndaj interesave kombëtare, duke e cilësuar atë si një “sharlatan” politik.
Koka vuri theksin te marrëdhëniet e Ramës me fondacionin Soros dhe aleancat me figura të diskutueshme si Thaçi dhe Vuçiç, të cilët, sipas tij, kanë dëmtuar çështjen e Kosovës.
Gazetari gjithashtu përmendi se këto veprime kanë shërbyer më shumë për të forcuar Serbinë sesa interesat e shqiptarëve në rajon. Ai paralajmëroi për një rrezik të sigurisë kombëtare, duke e lidhur atë me politikat që shkojnë përtej mbajtjes së pushtetit të Ramës.
Sipas Kokës, përfitimet që shqiptarët kanë pasur nga këto investime janë minimale, ndërsa ai sheh një përparim të padëshiruar të faktorëve serbë në rajon.
“Deklarata e zotit Rama, në raport me koherencën e tij, është deviza e tij politike. Në qoftë se të jesh sharlatan është aftësi, padyshim që zoti Rama është i pari i grupit.
Ne mbajmë mend që gjatë kohës së zotit Trump, por edhe të zotit Biden, këtu u artikulua një tezë që ishte rrezik potencial për të shkatërruar atë që është një nga investimet më të mëdha të Shteteve të Bashkuara në rajon, që është shteti i Kosovës. Koha tregoi që pikërisht miqtë e zotit Rama, fondacioni Soros me degë në Beograd, më pas edhe vullneti i Ramës, i Thaçit dhe i Vuçiçit, e çuan para një skenari realisht ogurzi dhe që të vetmin antagonist, besojeni ose jo, kishte Sali Berishën sot të shpallur, të dizenjuar “non grata”.
Pra, në qoftë se sot, me gjithë këto reagime, ne mund të gjejmë një momentum që i ka shërbyer Shqipërisë, por edhe faktorit shqiptar në rajon për t’u bërë më i fortë dhe për të qenë më faktor në rajon, unë do të tërhiqesha. Koha ka treguar gjithmonë të kundërtën e kësaj, që çdo investim i zotit Rama, çdo piruetë e tij politike, po ta marrim të mirëqenë që e ka bërë për qëllim të mirë, asnjëherë nuk e ka bërë faktorin shqiptar më të fortë, por çuditërisht ka favorizuar dhe ka bërë më të rëndësishëm faktorin serb dhe Vuçiçin.
Kur këto pirueta tejkalojnë vetëm qëllimin për të mbajtur pushtetin, por i shërbejnë një faktori që s’është aspak miqësor me Shqipërinë dhe në këtë rast është Serbia, këtu pastaj duhet të flasim realisht për rrezikun e sigurisë tonë kombëtare.”– u shpreh Koka në “Task Force’ në Syri Tv.
