Pasi Grupi Parlamentar i Partisë Demokratike zhvilloi takime me zyrtarë të lartë të BE-së, deputetja e PD Albana Vokshi, në një deklaratë për mediat, renditi çështjet për të cila kanë informuar eurodeputetët.
Vokshi deklaroi se ka informuar zyrtarët e BE-së për shkeljën e Kushtetutës, mos organizimi i zgjedhjeve të lira, për korrupsionin galopant, si dhe përdorimi i drejtësisë politikisht për të sulmuar e persekutuar opozitën nga ana e Kryeministrit Edi Rama. Ajo tha se kanë informuar eurodeputetët dhe për arrestimin e Ilir Metës më 21 tetor, për të cilin tha se ishte rrëmbim shokues i ish-presidentit në mes të ditës.
“U ndalëm në sulmin e paprecedentë ndaj opozitës me qëllimin e vetëm shkatërrimin e saj. Jemi 5 muaj para zgjedhjeve parlamentare dhe informuam të gjithë miqtë tanë dhe personalitetet lidhur me lidershipin e të gjithë partive të opozitës që ose është në arrest shtëpie, ose arrest me burg, ose kërcënohet me kallëzime penale apo çështje të ndryshme në gjykata.
Përmendëm dhe informuam gjerësisht në lidhje me arrestimin politik të kryetarit të PD-së, Sali Berisha që për pjesën më të madhe të vitit ka qenë pa akuzë, fakte e dëshmitarë, qëllimshëm për të dëmtuar PD për të hyrë në zgjedhje pa lidershipin e saj. Informuam për kolegun tonë Ervin Salianji që tashmë ndodhet në burg, vetëm për faktin se guxoi të denonconte ish-ministrin e Brendshëm që fshihte vëllain e tij që duhej të vuante dënimin prej 7 vitesh në Itali.
Dëshmuam rreth, jo arrestimit, por rrëmbim në mes të ditës të ish presidentit, ish-kryetarit të parlamentit zotit Meta. Pamjet ishin shokuese. Nuk mund të ndodhë një pamje e tillë për një ish-president në një vend që pretendon të ketë demokraci funksionale. Morëm mbështetje të pakufizuar për kërkesat tona”, u shpreh Vokshi.
Ajo deklaroi gjithashtu se kanë informuar eurodeputetët edhe për kërkesën e tyre për qeveri teknike, si e vetmja rrugë për zgjedhje të lira sipas opozitës. Ndërsa ka përmendur edhe rastin e ish-deputetit socialist Jurgen Çyrbja i cili tashmë është arrestuar.
“Njëra prej kërkesave kryesore, sigurisht duke u bazuar në faktin se me këtë qeveri të kryesuar nga Edi Rama, i cili ka ngritur një skemë të madhe patronazhimi i cili keqpërdor në shkelje të ligjit dhe kushtetutës, të gjitha burimet financiare dhe humane, i cili përdor bandat kriminale. Pas akteve të fundit të rënies së listës së deputetëve të Durrësit, të kryesuar nga Rama vetë, rastin e Çyrbes, i cili rezultoi i lidhur me krimin e organizuar, që ka bërë biseda për ta futur emrin tij në listën fituese të Durrësit, praktikisht është e pamundur që po këta njerëz të jenë përsëri në krye dhe përgjegjës të organizimit të zgjedhjeve. Një prej kërkesave kryesore tonat ishte një qeveri teknike, një qeveri që të kujdeset për muaj e fundit për organizmin e zgjedhjeve të lira dhe të ndershme. Kërkesa jonë ishte mbështetje për t’i kthyer mbrapsht demokracinë Shqipërisë, për të kthyer mbrapsht zgjedhjet e lira dhe të ndershme”.
Deputetët e opozitës ndodhen prej dy ditësh në Strasburg, ku dje protestuan me pankarta në duar për lirimin e Sali Berishës.
