Një nga protagonistët e gjithë përplasjes fizike mes punonjësve të FNSH-së dhe deputetëve të opozitës, Bledion Nallbati, deputet i PD ka sqaruar se si u tensionua situate, deri sa një nga oficerët e policisë të kërcënonte përmes armës së shërbimit.
Nallbati tha se e gjithë situata agravoi me prezencën e Forcave Speciale brenda ambienteve të Kuvendit të Shqipërisë, jashtë çdo ligji dhe rregulloreje.
Sipas Nallbatit, ka pasur konfrontim fizik mes punonjësve të policisë dhe deputetëve të opozitës, ndërsa në një moment njëri prej oficerëve kërcënon përmes përdorimit të armës.
Ligjvënësi opozitar tha se brenda rrethimit të ambienteve të Kuvendit nuk ka pasur prezencë të asnjë prej protestuesve, por vetëm deputetë të opozitës dhe punonjësit e Gardës.
“Kur situata u tensionua më shumë jo vetëm me deputetët por edhe gardistët, është dashur sipas Nallbatit ndërhyrja e këtyre të fundit për të larguar FNSH.
Përjashtimi i deputetëve është jashtë ligjit. Situata u nxit nga ndalimi i deputetëve të pa përjashtuar. Futja e Forcave Speciale në ambientet e Kuvendit, jashtë çdo ligji e rregulloreje. S’kishte asnjë protestues brenda Kuvendit, ishin vetëm deputetët e opozitës dhe diku te 200 punonjës garde. Forcat e policisë janë të ndaluar me ligj dhe rregulloren e Kuvendit të jenë aty.
Në një moment që po ktheheshim nga protestuesit te Kuvendi, na del gardhi para me policë, njëri nga efektivët vë dorën në këllëfin e armës. Unë s’kam autoritetin për t’i bërë kontroll fizik një punojësi polici. Në një moment tensioni mes policëve jashtë ligjit, një prej tyre provokon duke vënë dorën në armë. S’më dha asnjë përgjigje, e vijoi konfliktin më shtyrje e fyerje.
Ne s’jemi në këtë konflikt se duam ne. Çfarë duan ata atje, ç’punë kanë ata në ambientet e oborrit të Kuvendit. Brenda ambienteve kanë qenë deputetët e opozitës dhe 200 punonjës garde, mund të verifikohen përmes kamerave. Situata agravoi kur u fut policia brenda ambienteve.
Situata degjeneroi aq keq, sa patëm konflikt fizik, sa tentuan të na godasin me helmetë. Është dashur të futet garda për t’i shtyrë dhe për t’i larguar. Ka pasur konflikt edhe mes gardës dhe policëve, ka pasur dhe thirrje të gardës që të largohet policia. Ndaloni mos prekni deputetët, largohuni!”, tha Nallbati per Syri tv.
