Policia e Shtetit ka dalë me një komunikatë zyrtare në lidhje me aksionin e ekzekutuar me urdhër të SPAK, ku u godit një grup kriminal që merrej me trafikun ndërkombëtar të armëve.
Autoritetet bëjnë me dije se SPAK ka lëshuar 6 urdhër-arreste në total, ku tre prej tyre janë ekzekutuar, ndërsa tre të tjerë dyshohet se fshihen në Mbretërinë e Bashkuar.
Policia raporton se në kuadër të operacionit të koduar “INKORPORIMI” janë vënë në pranga shtetasit A. H., B. T. dhe R. A., të tre banues në Tiranë, për të cilët GJKKO ka caktuar masën e sigurisë “Arrest me burg”. Gjithashtu, në njoftim thuhet se vijon puna në bashkëpunim të ngushtë me autoritetet britanike, për kapjen e 3 shtetasve të tjerë që dyshohet se janë fshehur në Britani.
Gjatë operacionit janë ushtruar kontrolle në 6 banesa, në Tiranë dhe në Tropojë. Raportohet se në banesën e shtetasit A. H., i cili nga hetimi rezulton drejtuesi i grupit kriminal, është sekuestruar dhe një arsenal armësh.
Më konkretisht janë sekuestruar 25 armë zjarri (24 pistoleta dhe 1 kallashnikov), qindra fishekë, lazera që i montohen armëve speciale dhe shërbejnë për qitje në distancë, dhe pajisje optike. Gjithashtu janë sekuestruar edhe veshje kamuflazhi si ato të forcave speciale, 4 automjete, 8 celularë, karta SIM, 2 laptopë dhe 2 armë të ftohta (thika).
Sipas autoriteteve, ky operacion vjen pas hetimeve të nisura në muajin prill të vitit 2023, nga Drejtoria e Krimit të Organizuar në Policinë e Shtetit dhe Drejtoria Vendore e Policisë Durrës.
Më konkretisht, më 10 Prill të vitit të kaluar, Policia e Durrësit sekuestroi 8 armë zjarri pistoleta të llojit “Glock” në portin e Durrësit të cilat po transportoheshin nga një furgon me targa angleze. Furgoni është ndaluar nga policia në vijën e dytë të kontrollit të terminalit të trageteve ku më pas do të imbarkohej në tragetin e linjës Durrës-Ankona. Armët ishin ambalazhuar në një kuti kartoni dhe kishin destinacion Anglinë.
Hetimet më pas u morën nga SPAK. Në atë kohë u arrestua drejtuesi i furgonit, i cili do të transportonte armët drejt Britanisë, shtetasi Jetmir Koloshi.
Policia thotë se në drejtmin e SPAK-ut dhe në bashkëpunim të ngushtë me BKH-në dhe me autoritetet ligjzbatuese britanike, vijon operacioni për kapjen e shtetasve të tjerë të implikuar në këtë veprimtari kriminale.
