Prefekti i Qarkut të Vlorës, Vangjel Tavo është paraqitur këtë të martë në ambientet e Prokurorisë së Posaçme (SPAK).
Ende nuk dihet arsyeja e thirrjes së Vangjel Tavos në SPAK, se për cilën dosje po merret në pyetje. Ai ka hyrë në ambientet e SPAK rreth orës 09:30.
Një prej arsyeve të thirrjes së Vangjel Tavos në SPAK mund të jenë hetimi për dosjen e lobimit të LSI-në, ku dyshohet se kjo e fundit ka lobuar pranë zyrtarëve amerikanë në prag të zgjedhjeve të vitit 2017 në Shqipëri.
Sipas gazetatës amerikan Mother Jones, në prag të zgjedhjeve presidenciale dhe parlamentare të Shqipërisë, Grupi McKeon nënshkroi me LSI-në një kontratë lobimi prej 15 mijë dollarësh në muaj. Kontrata nuk u nënshkrua nga zyrtarët e LSI-së, por nga një avokat grek me emrin Iraklis Fidetzis, me të cilin kishte njohje njëri prej njerëzve të LSI-së, Vangjel Tavo.
Gjithashtu u hodhën dyshime se një vizitë e Vangjel Tavos në Uashington në fund të prillit 2017 lidhet me takimet që Grupi McKeon po organizonte me republikanë të Kongresit për llogari të firmës Dorelita.
Vlen të theksohet fakti se Vangjel Tavo u emërua nga Këshilli i Ministrave më 13 Mars në postin e Prefektit të Qarkut të Vlorës. Referuar burimeve të mediave greke, Rama e ka emëruar në këtë post Vangjel Tavon që më pas, kur të mbahen zgjedhjet e parakohshme në Himarë, ta kandidojë si kryebashkiak nën logon e Partisë Socialiste.
Vangjel Tavo ka qenë më herët deputet i LSI (sot PL) dhe ministër i Shëndetësisë (2012-2013).
