Anëtari i Kryesisë së PD-së, Belind Këlliçi, gjatë fjalës së mbajtur në protestën e sotme para Bashkisë së Tiranës deklaroi se opozita do ta intensifikojë aksionin opozitar.
Këlliçi ftoi qytetarët ditën e enjte në protestë para Kuvendit kundër kryeministrit Edi Rama, teksa i ftoi qytetarët sërish të protestojnë ditën e hënë para bashkisë kundër Erion Veliajt. Ai deklaroi se vetëm javën që shkoi, Veliaj i dha sërish 800 mijë euro inceneratorit që nuk ekziston. Sipas tij, kjo është një tallje për “kolegët” e SPAk-ut.
“Duhet të dini të gjithë ju se javën e kaluar, ndërkohë që qytetarët ishin në protestë këtu duke kërkuar veprime konkrete të SPAK dhe të organeve ligjzbatuese, Erion Veliaj i jepte me dhjetëra mijëra euro kompanisë së tij 5D. Për çfarë e paguante? Për një punë të kryer, për një tender prej gjysmë milionë euro që 5D ka marrë për të bërë një korsi biçikletash, por jo që korsi nuk ka, por aty është dhënë leje për të bërë një tjetër shumëkatësh. Erion Veliaj vetëm këtë javë që kaloi pagoi 800 mijë euro për inceneratorin që nuk ekziston. Kjo është një tallje që i bëhet jo vetëm Shqipërisë, por edhe ‘kolegëve’ të tij në SPAK. I bëj me dije qytetarëve se ndërkohë që jemi këtu në proestë, banorët e Shkozës kanë katër ditë pa ujë. Për këtë duhet të shqetësohet Policia e Shtetit, për qytetarët qënuk kanë ujë, nuk kanë kopshte, nuk kanë shkolla.
Ju ftoj që ta intensifikoni protestën tuaj. Ju ftoj të enjten në orën 10 para parlamentit. Me atë që ka ndodhur me reportazhin e RAI 3, me artikullin e BILD, me faktin që të gjithë mediat e mëdha e cilësojnë Shqipërinë si narkoshtet, çdo qytetar duhet të vijë përpara parlamentit për të larguar Edi Ramën. Javën tjetër, ditën e hënë më datë 10 qershor, në orën 11 do jemi sërish këtu në protestë, sërish këtu në ballafaqim,” tha Këlliçi.
Në fund ai u bëri thirrje drejtorëve të 5D që të kthehen në të penduar.
“Bëjeni për fëmijët tuaj, për të ardhmen tuaj,” tha Këlliçi.
