GJKKO ka rrëzuar kërkesën e shtetasit Blerand Kozici për zëvendësimin e masës së sigurisë nga arrest me burg, në atë të arrestit të shtëpisë ose detyrim paraqitjeje.
Në një njoftim të GJKKO thuhet se trupi gjykues i përbërë nga gjyqtarët Erjon Çela, Irena Gjykata dhe Erjon Bani me vendimin Nr. 280, datë 20.05.2024 vendosi rrëzimin e kërkesës së kërkuesit/të pandehurit Blerand Kozici.
Kozici ishte arrestuar për trafik emigrantësh, ndërsa ishte në fazë hetimesh dhe gjykimesh, u zbulua skema se ai kishte tentuar të korruptonte prokurorë e gjyqtarë, për ti ulur masën e dënimit.
Njoftimi nga GJKKO:
1. Kërkuesi Blerand Kozici më datën 13.05.2024, Nr. 280 Regj.Themeltar, ka paraqitur pranë Gjykatës kërkesën me objekt: Zëvendësimin e masës së sigurimit “Arrest në burg” në atë të “Arresti në shtëpi” apo “Detyrim paraqitje në policinë gjyqësore” parashikuar nga nenet 237 dhe 234 i K.Pr.Penale.
2. Në përfundim të gjykimit, Gjykata e Posaçme e Shkallës së Parë për Korrupsionin dhe Krimin e Organizuar, me trup gjykues të përbërë nga gjyqtarët Erjon Çela, Irena Gjykata dhe Erjon Bani me vendimin Nr. 280, datë 20.05.2024 vendosi:
1. Rrëzimin e kërkesës së kërkuesit/të pandehurit Blerand Kozici.
2. Kundër këtij vendimi mund të bëhet ankim brenda 5 ditëve, në Gjykatën e Posaçme të Apelit Kundër Korrupsionit dhe Krimit të Organizuar, afat i cili do të fillojë nga dita e njoftimit të vendimit.
Tiranë, me datë 20.05.2024.
Gjykata e Posaçme e Shkallës së Parë për Korrupsionin dhe Krimin e Organizuar
- Gjykata e Posaçme lë në burg edhe Inspektorin e IKMT, Julian Preni
Gjithashtu Gjykata e Posaçme ka lënë në burg edhe Inspektorin e IKMT, Julian Preni i cili u arrestuan mbrëmjen e 26 tetorit 2023 në kuadër të një operacioni të SPAK.
Nisur nga hetimet e kryera në kuadrin e këtij procedimi penal, rezulton se ekzistojnë dyshime të arsyeshme të bazuara në prova se, inspektori i IKMT-së Julian Preni ka konsumuar elementë të veprës penale, “Korrupsion pasiv i personave që ushtrojnë funksione publike”, të parashikuar nga neni 259 i Kodit Penal.
Në muajin mars të vitit 2020, Julian Preni me detyrë inspektor i IKMT-së i ka kërkuar shtetasit F. D. shumën monetare 7.500 Euro, për të mos i prishur objektin që kishte ndërtuar në plazh Ksamil, por pasi kanë negociuar ai i ka dhënë Prenit shumën prej 3000 Euro dhe nuk i është prishur objekti në vitin 2020 edhe pse ka pasur vendim prishje nga IKMT që prej muajit Shtator të vitit 2019.
Nga dokumentacion i administruar nga IKMT rezulton se objekti është prishur vetëm në datën 07.06.2021. Preni e shtyu prishjen me dy vite për tre mijë eurot që mori dhe tani përfundoi në burg.
Por “Boldnews.al” më herët ka zbuluar se inspektori Julian Preni posedon të ardhura të majme pasi zotëron në pronësi një hotel në Kavajë.
Megjithëse inspektori duhet të ishte në luftë me ndërtimet pa leje që ‘lulëzojnë’ si kërpudhat në të gjithë zonën bregdetare Julian Preni mbyllte sytë përballë ‘korrupsionit’ të pretenduar sipas organit të akuzës.
Paradoksale është fakti që vetë Julian Preni ka në pronësi edhe një ndërtim pa leje në Sarandë. Duke iu referuar dokumentit më poshtë, Festim Bashllari, pronar tokash në Ksamil, e ka paditur për “pushim cënimi” pikërisht atë që ishte inspektor i IKMT në këtë zonë.
NJOFTIM PËR MEDIAT:
1. Kërkuesi Julian Preni më datën 16.05.2024, Nr. 297 Regj.Themeltar, ka paraqitur pranë Gjykatës kërkesën me objekt: Zëvendësimin e masës së sigurimit “Arrest në burg” caktuar me vendimin nr. 115 datë 25.10.2024 të Gjykatës së Shkallës së Parë kundër Korrupsionit dhe Krimit të Organizuar, me një masë më të butë.
2. Në përfundim të gjykimit, Gjykata e Posaçme e Shkallës së Parë për Korrupsionin dhe Krimin e Organizuar, dhe me trup gjykues të përbërë nga gjyqtarët Erjon Çela, Elteva Deda dhe Erjon Bani, me vendimin Nr. 297, datë 21.05.2024 vendosi:
1. Rrëzimin e kërkesës së kërkuesit/të pandehurit Julian Preni.
2. Kundër këtij vendimi mund të bëhet ankim brenda 5 ditëve, në Gjykatën e Posaçme të Apelit Kundër Korrupsionit dhe Krimit të Organizuar, afat i cili do të fillojë nga dita e njoftimit të vendimit.
