Partia Demokratike ka denoncuar ditën e sotme se si qeveria po fsheh fluturimet dhe shpenzimet lidhur me to të zyrtarëve të Qeverisë.
Zëdhënësja e Anti-Korrupsionit në PD, Genta vangjeli, përmes një deklarate nga selia blu, tha se në analizën vjetore të Agjencisë së Prokurimeve Publike janë pasqyruar shpenzimet për blerjen e biletave të transportit ajror ndërkombëtar dhe Qeveria ka shpenzuar 2.9 milion euro në vitin 2022 dhe 3.6 milion euro ose 25% më shumë në vitin 2023.
Por, sipas saj, vlerat e paraqitura në raportin e APP janë pothuaj 3 fish më të ulëta se vlerat reale të regjistruara periodikisht në publikimet e shpenzimeve për blerje të biletave dhe udhëtimet jashtë vendit.
Ajo deklaroi se shpenzimet fundore për dieta e blerjen e biletave të transportit ajror për vitin 2022 kapin vlerën totale të 8.1 milion euro, ndërsa për vitin 2023 kjo vlerë shkon në 9.5 milion euro ose 18% më shumë.
Genta Vangjeli bëri thirrje që të hetohet nëse janë kryer veprime me dashje për të fshehur shpenzimet abuzuese e pa kriter të qeverisë që na drejton.
DEKLARATA E ZEDHENESES SE ANTIKORRUPSIONIT NE PD, GENTA VANGJELI:
Në analizën vjetore të APP-së për 2023 janë pasqyruar shpenzimet për blerjen e biletave të transportit ajror ndërkombëtar. Sipas këtij institucioni për vitin 2022 vlera totale e shpenzuar për bileta ishte 2.9 milion euro ndërsa për vitin 2023 vlera totale ishte 3.6 milion euro ose 25% më shumë.
Të dy këto shifra fshehin fluturimet dhe shpenzimet lidhur me to të zyrtarëve të Ramës.
Partia Demokratike bën me dije publikun se shpenzimet fundore për dieta e blerjen e biletave të transportit ajror për vitin 2022 kapin vlerën totale të 8.1 milion euro
Për vitin 2023 kjo vlerë shkon në 9.5 milion euro ose 18% më shumë.
Vlerat e paraqitura në raportin e APP janë pothuaj 3 fish më të ulëta se vlerat reale të regjistruara periodikisht në publikimet e shpenzimeve për blerje të biletave dhe udhëtimet jashtë vendit.
Sikurse vërehet shpenzimet reale nuk përkojnë me vlerat totale sipas raportit të APP-së.
A janë këto rezultate veprime të kryera për shkaqe të mungesës së disiplinës profesionale apo veprime të kryera me dashje për të fshehur shpenzimet abuzuese e pa kriter të qeverisë që na drejton?
Kjo duhet hetuar ….
Për parimin e transparencës as nuk po flasim sepse kjo qeveri dhe administrata e saj e konsiderojnë një fjalë boshe që kërkohet nga Brukseli, por nuk ka vlerë në Shqipëri.
