Kryeministri Edi Rama thotë se rihapja e hetimeve për dosjen e laboratorit të kokainës në Xibrakë është një lajm i mirë, pasi Gazment Bardhi publikoi dokumentet që implikojnë vëllain e tij, Olsi Rama.
Në një intervistë për emisionin “Opinion”, Rama deklaroi se SPAK-u duhet të thotë nëse “ai ka një trafikant kokaine në familjes”, ose siç e thotë ai “gojës së madhe të B-së së vogël i duhet vënë proteza”, duke iu referuar Gazment Bardhit.
Sipas tij, ose Olsi Rama ose Gazment Bardhit duhet të përgjigjen para drejtësisë.
Blendi Fevziu: Deklaruat për çështjen e Gazment Bardhit dhe akuzën ndaj vëllait tuaj se nuk u mor parasysh, ndërkohë Bardhi ka deklaruar 2 ditë më parë se SPAK ka rihapur hetimet në lidhje me këtë dosje.
Edi Rama: Rihapja e hetimeve ishte lajmi më i mirë që unë mund të merrja. Tani ka edhe një detaj të vogël që duhet të konfirmohet kallëzimi. Të konfirmohet kallëzimi sepse ky “zotëria Çingia” është i kallëzuar për kallëzim të rremë. Janë 2 aty në SPAK, është kjo dhe kallëzimi për të për kallëzim të rremë dhe jam i lumtur që gjëja është futur në rrugën e drejtësisë dhe SPAK-u ta thotë, o unë kam një trafikant kokaine në familje, ose kjo goja e madhe e B-së së vogël i duhet vënë proteza nga drejtësia, një nga këto të dyja. Këtu nuk mund të ketë edhe kështu, edhe ashtu. Këtu, ose njëri, ose tjetri duhet të përgjigjen para drejtësisë.
