Nga Boldnews.al
Deputeti i Partisë Socialiste, Fatmir Xhafaj, shihet rrallë në Parlament, e po aq rrallë të mbajë fjalime. Mirëpo të enjten ai foli gjatë, ndryshe nga herët e tjera, si në tekstin e fjalimit, ashtu edhe në diksionin e leximit. Nëse do i hiqej pamja dhe mbetej vetëm zëri, do të ngatërrohej me tekstlexuesit radiofonik të kohës së komunizmit mbi arritjet, sukseset dhe bëmat e “shokut Erion”, për lulëzimin e Tiranës e cila begatohet çdo ditë…
Po përse Veliaj e thirri në apel për ndihmë në këtë kohë dhe përse ka shumë nevojë pikërisht për Fatmir Xhafajn? Mjaft analistë të velur nga yndyra e Veliajt, mundohen që t’i japin vlerë fjalimit të Fatmirit me pushtet të hershëm, teksa e cilësojnë si një vlerë brenda partisë dhe njeriun që në fillim bashkë me ndërkombëtarucët gatoi këtë çorbë të drejtësisë së re.
Pushteti i vërtetë nuk është në deklarata publike, por ai që luhet në korridoret e errëta ku shkon fjala për të mbrojtur dikë apo sulmuar një tjetër me duart e SPAK-istave. Megjithatë, Fatmir Xhafaj, dy herë ish-ministër i rëndësishëm në kohën e Nanos dhe Ramës, tentoi të tregojë se është xhaketa e vjetër brenda PS-së, për të cilën Rama në çdo palë zgjedhje do ketë nevojë. Dhe këtu ka plotësisht të drejtë. I vetmi personazh publik dhe politik sot që ka ngrënë në sofrën e udhëheqjes në dy sisteme është Fatmir Xhafaj. Dikur dilte në fotografi krah Enver Hoxhës, më pas iu bashkangjit Fatos Nanos dhe mbeti po në tavën e pushtetit edhe në epokën e Ramës. Janë të rrallë individët me shumë shartime: Komunist-Socialist-Rilindas-Ndërkombëtarist…
Po ashtu dalja hapur në mbrojtje të Veliajt në fjalimin që mbajti në Parlament ishte sinjal i qartë për dy pushtetet që drejtohen nga një i supërpushtetshëm. Së pari, Xhafaj i dha devizën prokurorëve dhe gjyqtarëve veting-kaluar me (izëm personal) që Lali Eri nuk duhet të preket. Madje ‘hulumtoi’ aq thellë sa të shesë vajtjen e Veliajt në SPAK si një “vlerë institucionale” që na e mbartka pikërisht ky kryebashkiaku i Tiranës. SPAK-istave dhe GJKKO-istave ua tha qartësisht se “aleshverishi” i tre apo më shumë drejtorëve të Bashkisë nuk duhet të zhbëjë “punën e mirë” të Veliajt, (kjo sipas Xhafajt).
Ai edhe mund të mos i njohë fare këta pesë drejtorët e famshëm superhajdutë të përzgjedhur nga Veliaj, por njeh mirë Lalin e vogël, që në zgjedhjet e vitit 2021 bëri një sakrificë të madhe për Xhafajn, duke dalë kundër vullnetit të Ramës i cili kërkoi ta largojë nga politika ish-ministrin e tij me lezet. Vetë Xhafaj, me ndihmën e madhe të Veliajt mundën të thyejnë herësin në Tiranë dhe siguronin aq vota sa të rikthehej në Parlament, por pa marrë revansh…
Sistemi, “punët e mëparshme” me hetime të thelluara që shoqëroheshin me hakërrime hetuesish dhe ushtrim dhune mbi “armiqtë e partisë” e kanë stërvitur fort mjaftueshëm për të kuptuar proverbin e servilëve që para shefit dhe pas mushkës mos qëndroro… Ama sot i duhet të tentojë të qëndrojë para shefit, jo për ta sfiduar, por në një lloj mënyre për t’i kërkuar një “nder” jo të vogël: Lali të mos preket… Shtuar këtu edhe ca arsye personale mbi disa leje ndërtimi për pallate e njësi shërbimesh që në fund përkthehen në vlera monetare që në sistemin e ngritur nga Rilindja, sjellin mandate deputetësh dhe blerje posti.
E dyta po aq e rëndësishme është se me daljen publike në mbrojtje të Veliajt, Xhafaj i kujton Ramës se në drejtësinë e re, të superkontrolluar nga Rama, ka edhe ai dorë. Në atë drejtësi që Rama sot mburret dhe po e përgatit si “kalë beteje” për zgjedhjet e vitit të ardhshëm Fatmiri me Xhekët e Jakobët ndërkombëtarucë, e shitën “ujin e Lanës” si të ishte nga burimet e kulluara të alpeve.
Drejtësia e re dhe veçanërisht SPAK, do detyrohet të tëheqë karrocën ku Rama ka hipur, madje edhe të durojnë kamxhikun për të nxituar drejt fitores pas një viti… Ky kalë që tjek duke shkumuar këtë karro të sajuar, po ushqehet me tagji partie, dhe… ndonjë torbë e ka mbushur edhe Fat-miri i partisë. Me fjalimin e mbajtur në Parlament fare direkt, pa i rënë hiç anash dhe lënë nënkuptime, Xhafaj po i kërkon Ramës është që të mos tentojë të shesë Lalin.
Sot Ramës i kërkohet si nder, nesër ndoshta si kërcënim, ndaj dalja në skenë e Fatmir Xhafajt në mbrojtje të Veliajt nuk është për tu marrë me sportivitet nga kreu i qeverisë. Ndërsa Veliaj në fakt e zbrazi fishekun e fundit, duke shpresuar në “Fatin e mirë” për të qëlluar në shenjë. Çfarëdo që të ndodhë të paktën Lali i Bashkisë Tiranë tregoi se politikisht është blozë, duke nxjerrë në pah edhe karakterin fare perdhe dhe frikën e dukshme teksa thërret për ndihmë këdo, nga i varfëri fatzi që fshin natën rrugët e Tiranës, deri tek Fatmiri i hetuesisë dhe partisë
