Prokuroria e Posaçme (SPAK) ka përfunduar hetimet paraprake për tre zyrtarë të “Ujësjellës Kanalizime” Tiranë dhe ndaj një biznesmi, duke e dërguar dosjen për gjyq, në ngarkim të pandehurve.
Bëhet fjalë për tre zyrtarët Ledia Ramo, Ortjon Dhami dhe Engjëll Dedja, të cilët akuzohen për kryerjen e veprës penale “Shkelja e barazisë së pjesëmarrësve në tendera apo ankande publike”. Po ashtu, i pandehur është marrë dhe biznesmeni Bledar Shemaj, ortak e administrator i kompanisë “W Center” sh.p.k.
Katër shtetasit e mësipërm akuzohen për abuzimet me tenderin me objekt “Blerje kimikate dhe karbon aktiv për UKT sh.a”, me vlerë 143.618.333 lekë pa TVSH.
Më konkretisht, tre zyrtarët, gjatë procedurës së shqyrtimit të ankesave, kanë kanë ndryshuar njërin nga specifikimet e tenderit që kishte të bënte me figurimin në listëpagesa të një punonjësi manovrator të mjeteve të rënda (duke e hequr si kërkesë), për të favorizuar kompaninë e Bledar Shemjas.
LEXO EDHE: Tenderat e “Lalit”/ 1.3 milionë euro pa garë për klorin e Ujësjellësit të Tiranës
“Nga hetimet e kryera rezulton se, të pandehurit Ledia Ramo, Ortjon Dhami dhe Engjëll Dedja, punonjës të shoqërisë tregtare “Ujësjellës Kanalizime” sh.a., dega Tiranë, kanë marrë pjesë si anëtarë të Komisionit të Shqyrtimit të Ankesave dhe më pas, si anëtarë të Komisionit të Vlerësimit të Ofertave, në procedurat për prokurimin me objekt “Blerje kimikate dhe karbon aktiv për UKT sh.a”, me procedurë të hapur marrëveshje kuadër, të datës 11.01.2019, me vlerë 143.618.333 lekë pa TVSH. Ata akuzohen se gjatë procedurës së shqyrtimit të ankesave kanë ndryshuar njërin nga specifikimet, që kishte të bënte me figurimin në listëpagesa të një punonjësi manovrator të mjeteve të rënda (duke e hequr si kërkesë), për qëllime të favorizimit të shoqërisë “W Center” sh.p.k, me numër nipti K63029402A, me ortak e administrator të pandehurin Bledar Shemaj. Më pas gjatë vlerësimit të ofertave e kanë kualifikuar këtë shoqëri pavarësisht se nuk përmbushte njërin nga specifikimet e kërkuara, atë të pasjes nga ana e manovratorit të mjeteve të rënda të një leje drejtimi të vlefshme.
Ndërkohë që i pandehuri Bledar Shemaj, akuzohet se ka paraqitur në këtë procedurë prokurimi një kontrate pune duke paraqitur rrethana të rreme mbi punësimin e shtetasit Q.M në shoqërinë e tij (si manovrator i mjeteve të rënda), specifikim për të cilin kishte patur ankesa më parë nga operatorë të tjerë, si dhe ka paraqitur rrethana të rreme në deklaratën e plotësuar prej tij si dokument standard mbi kontratat e paraqitura për marrjen me qira të mjeteve me të cilat do të kryente shërbimet, në një kohë që nga zbatimi i kontratës rezulton se shërbimi është kryer duke përdorur mjete që i’u përkasin shoqërive të tjera.” – thuhet në njoftimin e SPAK.
Tenderat e “Lalit”/ 1.3 milionë euro pa garë për klorin e Ujësjellësit të Tiranës
