Teksa gjatë ditës së martë pritet të mbahet protesta e opozitës para Bashkisë Tiranë, kreu i PD-së Sali Berisha iu ka bërë thirrje protestuesve që nesër ta dërgojnë kryebashkiakun Erion Veliaj tek burgu 313-të në kryeqytet.
Gjatë fjalës së tij mbrëmjen e sotme, Berisha tha se të martën qytetarët marrin në dorë fatin e tyre, fatin e bashkisë, fatin e Tiranës, fatin e Shqipërisë.
“Nesër mbarë Shqipëria, kombi shqiptar kudo që ndodhet, ka sytë, mendjen dhe zemrën tek veprimi juaj, zemërimi juaj, fitorja juaj në Bashkinë e Tiranës. Nesër shqiptarët presin që qytetarët e Tiranës të dëshmojnë shqiptarizmin e tyre. Presin të faktojnë veten si europianë të vërtetë.
Presin që me zemërimin e tyre të çlirojnë Bashkinë e Tiranës, shtëpinë e parë të kryeqytetit nga një bandë hajnash pa asnjë moral, që aplikojnë modelin e vjedhjes 100 përqind të parave të taksapaguesve të Tiranës. Të dashur miq, nesër është dita e qytetarit. Është dita e luftëtarëve të lirisë. Është dita në të cilën Erion Veliaj kapet për zverku dhe dërgohet në 313-ën. Nesër është dita që qytetarët marrin në dorë fatin e tyre, fatin e bashkisë, fatin e Tiranës, fatin e Shqipërisë”, tha Berisha.
