Kreu i Bashkisë së Tiranës, Erion Veliaj është “njëshi” i propagandës.
Kryebashkiaku i kryeqytetit kërkon t’i hedhë “hi syve” shqiptarëve duke “pastruar” imazhin e drejtorëve të tij të arrestuar me urdhër nga SPAK për korrupsion galopant.
Veliaj lutet që vartësit e emëruar prej tij të dalin nga qelia e burgut madje shtoi se atyre duhet t’u jepet mundësia të dalin të pafajshëm nga i gjithë ky skandal.
Madje Veliaj, paralajmëroi opozitën që mos nxitohet me konkluzione para se drejtësia të marrë vendim për 5 drejtorët e tij të arrestuar për miliona euro të vjedhura të taksapaguesve të kryeqytetit, si pjesë e aferës “5D”.
“Drejtorët e arrestuar uroj të dalin të pafajshëm. Ata duhet të kenë mundësi që me prova të tregojnë se janë të pafajshëm. Dua t’u them atyre pakicës që mos u nxitoni dhe mos hidhni gur ndaj njerëzve, duhet të flasë drejtësia. Unë vetë pas kam pas shumë shpifje por kur ka fol drejtësia shpifësi është dënuar dhe unë kam fituar të gjitha këto beteja në gjyq. Sipas pakicës, unë që kur linda isha fajtor. Ndaj them që këto arrestimet për një pjesë e popullsisë është argëtuese, kurse pjesa tjetër e popullsisë shikojnë hallet e tyre. Ata që nuk punojnë nuk e dinë cfarë do të thotë sa komplekse është puna me shumë njerëz. Mos shqyejmë njëri-tjetrin me molotov, nuk është gjuha jonë për vitin 2024. Ata të pakicës duhet të sillen si njerëz dhe t’i lenë drejtësisë të bëjë punën e vet, dhe mos gjykojnë me dy standarde”, tha Veliaj gjatë intervistës në Abc News.
Kujtojmë që disa ditë më parë shoqëria civile së bashku me opozitë protestuan përballë Bashkisë së Tiranës ku kërkuan dorëheqjen e kryebashkiakut Erion Veliaj pas aferës “5D”, ku disa prej drejtorëve të kësaj Bashkie kishin përfituar miliona euro tendera nga kjo bashki apo institucione vartëse të saj me kompaninë e tyre “5D Konstruksion”, që sipas SPAK, pronarët “de facto” të saj ishin Mariglen Qato dhe Redi Molla.
