Kryeministri britanik Rishi Sunak u zotua të hënën se do të nisë kthimin e azilkërkuesve në Ruandë brenda 10 deri në 12 javësh. Ai i tha Dhomës së Lordëve, dhoma e sipërme e parlamentit, se do të zbatojë legjislacionin e ri pavarësisht kundërshtimeve.
Kryeministri Sunak tha se qeveria ka rezervuar avionë dhe staf të trajnuar për të kthyer emigrantët në Ruandë. Kjo është pjesë e përpjekjeve që ai shpreson se do të rrisin përkrahjen për partinë e tij Konservatore përpara zgjedhjeve që pritet të mbahen në fund të këtij viti.
“Nuk bëhet fjalë nëse mund të ndodhin. Këto fluturime për në Ruandë do të realizohen”, tha Kryeministri Sunak në një konferencë për shtypin.
Dhjetëra mijëra emigrantë, shumë prej të cilëve ikin nga luftërat dhe varfëria në Azi, Lindjen e Mesme dhe Afrikë, kanë arritur në Britani vitet e fundit. Ata mbërrijnë në ishull kryesisht duke kaluar Kanalin e La Manshit me varka të vogla në udhëtime të rrezikshme të organizuara nga bandat që merren me kontrabandë njerëzish.
Ndalimi i fluksit të emigrantëve është një nga objektivat kryesorë të qeverisë konservatore, por kritikët thonë se plani për të dëbuar njerëzit në Ruandë është çnjerëzor dhe se ky shtet i Afrikës Lindore nuk është një vend i sigurt.
Zbatimi i këtij vendimi është penguar shpesh nga Dhoma e Lordëve ose dhoma e sipërme e parlamentit dhe ai mund të përballet me sfida të mëtejshme ligjore nëse miratohet. Legjislacioni do të kthehet të hënën në dhomën e ulët të parlamentit, ku ligjvënësit pritet të heqin ndryshimet e propozuara nga Dhoma e Lordëve.
Kryeministri Sunak, partia e të cilit sipas sondazheve është pas Laburistëve, tha se një pistë ajrore ishte në gatishmëri dhe se vendet ishin rezervuar për fluturime. Stafi prej pesëqind personash është trajnuar dhe tani është gati të shoqërojë emigrantët “deri në Ruandë”.
“Ne jemi gati. Aeroplanët janë gati. Këto fluturime do të kryhen pavarësisht se çfarë mund të ndodhë”, tha ai.
Sipas politikës së hartuar para dy vjetësh, çdo azilkërkues që arrin në mënyrë të jashtëligjshme në Britani do të dërgohet në Ruandë me qëllim që të pengojë kalimet përmes Kanalit të La Manshit dhe të dëmtojë planet e kontrabandistëve.
Ekipi i zotit Sunak shpreson që kjo politikë, që ishte një premtim parazgjedhor, do të rrisë përkrahjen për partinë, veçanërisht midis votuesve të pakënaqur konservatorë që duan të shohin një ulje të imigracionit.
Sondazhet thonë se Partia Konservatore e Kryeministrit britanik do të pësojë humbje të rëndë në zgjedhjet e këtij viti nga Laburistët, të cilët kanë thënë se do ta anulojnë programin për kthimin e emigrantëve, nëse fitojnë pushtetin.
Edhe nëse Kryeministri Sunak arrin të pengojë Dhomën e Lordëve të bllokojë legjislacionin, ai mund të përballet me sfida të tjera ligjore.
Organizatat bamirëse dhe grupet e të drejtave thonë se do të përpiqen të ndalojnë deportimet individuale. Sindikata që përfaqëson punonjësit e forcave kufitare është zotuar ta kundpështojë në gjyq si të paligjshëm vendimin e ri, “brenda disa ditësh” pasi azilkërkuesit e parë të njoftohen se do të kthehen në Ruandë./VOA
