Ka përfunduar mbledhja në Këshillin për Rregulloren, Mandatet dhe Imunitetin, ku u diskutua mbi çështjen e mandatit të deputetes socialiste, Olta Xhaçka.
Në përfundim u vendos, që të enjten parlamenti të votojë nëse do e dërgojë për shqyrtim çështjen në Gjykatën Kushtetuese. Kjo u quajt nga opozita si tentativë për të vonuar marrjen e vendimit derisa ti mbarojë mandati Xhaçkës
Mbledhja e cila nisi në orën 14:00 në Kryesinë e Kuvendit. Deputetët e opozitës Gazment Bardhi e Ervin Salianji akuzuan maxhorancën se është bërë mburojë e Olta Xhaçkës dhe kërkoi që çështja të mos zvarritet por të futet në rend të ditës në seancën e ardhshme.
Parlamenti mori në shqyrtim mandatin e deputetes dhe ish-ministres së Mbrojtje dhe të Jashtme, Olta Xhaçka, një vit e gjysëm pasi Gjykata Kushtetuese e detyroi që të dërgonte pranë saj çështjen për shqyrtim.
Në Shkurt të vitit 2023, Gjykata Kushtetuese pranoi pjesërish kërkesën e një grupi deputetësh, të cilët kërkonin që të detyrohej Parlamenti të dërgonte pranë asaj gjykate kërkesën për shqyrtimin e mandatit të Xhaçkës, ndaj të cilës ekzistojnë dyshime për konflikt interesi.
Në Mars të vitit 2021, Komiteti i Investimeve Strategjike, i drejtuar nga kryeministri Edi Rama, miratoi statusin e “investitorit strategjik” për Artan Gaçin, bashkëshorti i Xhaçkës dhe ish-deputet i Partisë Socialiste, me qëllim ndërtimin e një resorti turistik në Gjilekë të Dhërmiut, në zonën e Himarës.
Një vit më pas, në vitin 2022, Këshilli i Ministrave miratoi dhënien pa qira në favor të projektit të Gaçit të vijës bregdetare para resortit turistik.
Këto lëvizje u konsideruan si “konflikt interesi” nga ana e opozitës, pasi Olta Xhaçka në atë kohë ishte pjesë e kabinetit qeveritar, në pozicionin e Ministres së Jashtme.
Me kërkesën e opozitës, Parlamenti ngriti një Komision Hetimor. Siç ndodh rëndom, palët politike u ndanë në rezultatet e këtij Komisionit. Maxhoranca parlamentare socialiste e Edi Ramës konstatoi se Olta Xhaçka nuk ishte në kushtet e konfliktit të interesave dhe vendosi të mos e përcillte çështjen e vlefshmërisë së mandatit të saj në Gjykatën Kushtetuese.
Nga ana tjetër, opozita këmbënguli se raportet e Komisionit Hetimor duhet të dërgoheshin në Kushtetuese, e cila nga ana e saj duhet të shqyrtonte rastin “Xhaçka” në dritën e nenit 70, pika 2 e Kushtetutës, që parashikon kushtet e humbjes së mandatit të deputetit.
Pas refuzimit të shumicës parlamentare për të dërguar çështjen në Kushtetuese, dy grupime të opozitës iu drejtuan asaj Gjykate.
Një grupim i vogël opozitarësh, të grupit “Basha-Alibeaj” kërkuan nga Kushtetuesja që të detyronte Parlamentin për t’ia përcjellë asaj gjykate rastin e Olta Xhaçkës.
Ndërsa një grup më i madh deputetësh opozitarë, kërkuan nga Gjykata Kushtetuese që të merrte drejtëpërdrejtë në shqyrtim mandatin e Xhaçkës.
Gjykata Kushtetuese, me një manovër më shumë politike se sa ligjore, legjitimoi kërkesën e grupit të vogël opozitar, duke i kërkuar Parlamentit që t’ia dërgonte për interpretim çështjen e deputetes socialiste.
Kjo zvarritje u vijua më tej në Parlament. Shumica socialiste, e përfaqësuar nga kryetarja e Parlamentit, Lindita Nikolla, nuk e vendosën çështjen “Xhaçka” për shqyrtim në seancë plenare, por vendosën që ta rikthenin sërish për diskutim në Këshillin e Mandateve dhe Imunitetit, duke e shtyrë në kohë vendimin për themelin e çështjes.
Tashmë, pas më shumë se një viti, rasti i Xhaçkës u rikthye sërish në tavolinën e anëtarëve të këtij Këshilli dhe është ende e paqartë nëse rasti do t’i përcillet Gjykatës Kushtetuese.
