Gjatë fjalës në protestën e sotme, kreu i PD-së Sali Berisha është ndalur dhe tek arrestimi i dy ish-drejtorëve të Bashkisë së Tiranës Mariglen Qato dhe Redi Molla, në lidhje me tenderat e fituara nga kompania “5D Konstruksion”, ku sipas SPAK, dy të arrestuarit ishin pronarët faktik.
Berisha përmendi hotelin me 5 yje që po ndërtohet në Durrës nga kompania “Mediterranean Investment Group”, e cila ka marrë status special si investitor nga Ministria e Turizmit. Kumbaro e prezantoi këtë si një investim 15 milionë eurosh, teksa kompania u themelua në shtator të vitit 2020 dhe njëri prej aksionerëve me 24% ishte Selim Molla, babai i ndjerë i Redi Mollës, i cili ia trashëgoi aksionet në birit në shkurt 2024.
Në kohën kur kompania me aksioner babanë e tij mori statusin e veçantë të “Investitorit në strukturë akomoduese me 5 yje, status special”, Molla ishte administrator i Tirana DC, një ndërmarrje me aksionere 100 % Bashkinë e Tiranës, të cilën e drejtoi deri në vitin 2023. Më herët ai ka qenë për 5 vjet drejtues i Ujësjell Kanalizime Tiranë nga viti 2016 deri në vitin 2020.
Lideri demokrat përmendi përgjimet në lidhje me këtë hotel, ku përmendet edhe kreu i Bashkisë së Tiranës, Erion Veliaj. Berisha deklraoi se nuk ka fakte, por se për hotelin e Durrësit, sipas tij, është ortak edhe kryeministri Edi Rama.
Po ashtu, Sali Berisha denoncoi edhe hotelin luksoz “La Brisa” në Dhërmi, i cili sipas letrave, zotërohet 40% nga ish-drejtori në Ujësjellësin e Tiranës Elvin Tivari, si dhe nga Fatos Malaj, vëllai i kryetarit të Bashkisë Matit, Agron Malaj.
Berisha: A e patë ju, një i quajtur Redi Molla me një hotel me 5 yje nga më gjigantët në Shqipëri, një njeri që kishte gjithsej në ndërmarrjen e tij, veç një punëtor, edhe punëtor edhe menaxher me një rrogë 300 mijë lekë. Hoteli minimumi 15-20 mln euro. Po si mundet një inxhinjere në regjistrimet e SKAP-it i thotë shoqes se nuk është i Redit, por është i Erjonit dhe i atij drogmenit, trafikantit Qato? A e dinë qytetarët e Tiranës se drejtori i ujësjellësit të Tiranës, fiton tenderin për të furnizuar me ujë bashkinë e Tiranës? Si mund të durojmë me një gjë të tillë? Po në sulm, në sulm. Nuk durohet kjo kurrë! Nuk kam fakte, por për hotelin e Durrësit thuhet se është ortak edhe vetë Rama. Nuk kam fakte, por që të ndërtohet një hotel me 5 yje, gjigant, nga një njeri që ka vetëm një punëtor dhe paguan 300 mijë lekë, kjo mbi këtë tokë nuk mund të ndodhë kurrë. E njëjta gjë, Tivari në Dhërmi një nga hotelet më të mëdha me Agron Malajn, kryetarin e Bashkisë Mat. Tivari i ka dhënë vëllait të Agronit, tendera nga ujësjellësi i Tiranës, dhjetëra milionë euro. Të gjitha të vjedhura të shkuara në Dhërmi, ndërtim hotelesh. Çfarë do të rrimë ne, të presim ne të vazhdojmë të numërojmë vjedhjet e tyre? Jo more kurrë! Duhet të ngrihemi 1 minutë e më parë dhe të përballemi, nuk ka rrugë tjetër.
