Nënkryetari i Partisë Demokratike, Luçiano Boçi, ka hedhur akuza drejt kryeministrit Rama se qëllimi i tij është të sundojë dhe jo të qeverisë.
Gjatë fjalës së tij në takimin me demokratët në Fier, Boçi e ka cilësuar Ramën si armikun e vendit, teksa ka treguar disa mënyra që PD mund të ndjekë në favor të qytetarëve dhe të ardhmes së vendit.
“Nuk mjafton thjesht që të themi të vërtetat ndaj Ramës, por duhet të nisim të komunikojmë, të ndërtojmë PD në çdo cep, në çdo vend, të trokasim në çdo derë, në çdo zemër, për ti dhënë dorën dhe besën çdo shqiptari se lufta jonë është luftë për ta, për fëmijët e tyre, për të ardhmen e vendit.
“Edi Rama ka ndërtuar fronet e pushtetit të tij, ku zhytet në luks, dhe këtë sundim na e shesin si kulmin e lumturisë, si kulmin e drejtësisë.
Projektin për narko-shtetin Edi Rama e nisi në 2014 me Xibrakën. Ndërtoi parajsën e tij dhe ferrin e qytetarëve të thjeshtë.
Qëllimi i Ramës është të sundojë dhe jo të qeverisë, është të sundojë dhe jo të shërbejë. Detyra jonë qytetare është që këto frone të sundimit ne ti shkërmoqin, të përmbysim këto frone.
Po Edi Rama është e keqja e këtij vendi, është armiku ynë i padiskutueshëm”, tha Boçi.
“Duhet të ngremë qytetarin në atë piedestalin që meriton, të kthejmë shpresën në këtë vend, të mbështesim të rinjtë, fermerët që të dashurojnë punën e tokën, ti ofrojmë shqiptarëve një qeverisje të mirë, të mbështesim moshën e tretë, që ata të mos vuajnë për të marrë shërbimet. Ne duhet të ofrojmë kontratën me qytetarët. Jemi në një luftë të 3-fishtë, kemi 11 vite që përballemi me skalionet e krimit të organizuar dhe atij politik. Rama e ka vjedhur, e ka blerë, e ka pushkatuar votën dhe ne kemi krijuar bindjen dhe kemi përcaktuar qëllimin: të arrijmë një qeveri teknike dhe të bëjmë një reformë zgjedhore që garanton votën e lirë”, – shtoi më tej Boçi.
