Nënkryetari i Këshillit Bashkiak të Tiranës, Dorian Teliti shprehet se procesi i rindërtimit pas tërmetit tragjik të vitit 2019, do hyjë në historinë e vendit si një prej proceseve më të gjata, në emër të të cilit janë kryer dhe po bëhen abuzime të paimagjinueshme.
Në një postim në rrjetet sociale, Teliti shkruan se Qeveria kishte premtuar se ky proces do të përfundonte maksimumi brenda dy vitesh, por jemi në vitin e pestë dhe familjet jo vetëm që ende nuk kanë marrë “çelsat” por as nuk dihet se kur do të ndodhë dicka e tillë.
Ai shton më tej se gjatë periudhës 2020-2023 qeveria ka paguar 920 milionë euro për këtë proces nga paratë e buxhetit, ndërkohë që 65 milionë euro të tjera priten të paguhen edhe këtë vit.
“Ç’u bë dhe ç’po bëhet me pothuajse 1 miliardë euro të rindërtimit? Pse nuk përfundojnë godinat e banimit? Kush dhe pse po e zvarrit këtë proces?” – janë disa prej pyetjeve që shtron Teliti.
Postimi i plotë:
Rindërtimi i pa-ndërtuar po kap vlerën 1 miliardë euro!
Rindërtimi do hyjë në historinë e vendit si një prej proceseve më të gjata, në emër të të cilit janë kryer dhe po bëhen abuzime të paimagjinueshme!
❌Mungesë transparence, përdorim jo-eficient i parasë publike, procedura prokurimi klienteliste shpeshherë pa gare me justifikimin e emergjencës, monitorim i cekët dhe mungesë totale informacioni mbi ecurinë e procesit, kosto sociale të pallogaritshme si pasojë e zvarritjes së procesit, etj, janë vetëm disa nga shqetësimet kryesore që po shoqërojnë këtë proces.
Premtimi: Pas termetit të 26 nëntorit 2019, qeveria u zotua që cdo familje e prekur do strehohej në shtëpitë e reja brenda 1-max 2 viteve. Me fjalë të tjera, procesi i rindërtimit do mbyllej brenda vitit 2021.
Fakti 1: Jemi në vitin e pestë dhe familjet jo vetëm që ende nuk kanë marrë “celsat” por as nuk dihet se kur do të ndodhë dicka e tillë. Të pakët në numër dhe të vetmit fatlumë kanë qenë ata që morën shtëpi të ndërtuara dhe dhuruara nga donatorë të huaj.
Fakti 2: Gjatë periudhës 2020-2023 qeveria ka paguar 920 milionë euro për këtë proces nga paratë e buxhetit, ndërkohë që 65 milionë euro të tjera priten të paguhen edhe këtë vit.
Pyetje: C’u bë dhe cpo bëhet me pothuajse 1 miliardë euro të rindërtimit? Pse nuk përfundojnë godinat e banimit? Kush dhe pse po e zvarrit këtë proces?
Pyetje: Pse për një kullë 30 katëshe punimet zgjasin as tre vjet, ndërkohë që për banesat në godina pak-katëshe të gjynafqarëve jemi në vitin e pestë dhe ende nuk dihet se edhe sa muaj apo vite do duhen që të përfundojnë së ndërtuari?
Pyetje: Kush japë llogari e kush do mbajë përgjegjësi per rreth 100 milionë euro faturë financiare për bunuset e qirave, ndërkohë që nëse ky proces do ishte mbyllur në respekt të premtimit qeveritar, kjo kosto do ishte disa herë më e ulët?
I bëjmë thirrje qeverisë të bëjë transparencën e munguar mbi këtë proces jetik për qindra e mijëra familje dhe njëkohësisht të mbylle një ditë e më parë punimet që zvarriten pafundësisht nga kalendat e korridoret e pushtetit.
